~ Wati Longchar (Ekranipathar)

YSS sensaksem ka nung sabangpur kadi tanü Ao arogo nung nüngdakba kaji “`Clergy-centred’ nungi `Congregational-centred’ dangi meyiptsü nüngdak” olen ka shioktsü. Tanü Ao Mungdang/ arogo ya clergy-centred küma aor asü ta tasüngdang ka nung tebilemba balala aika lemsatep. (Iba ocet nung ‘clergy” ta asüba ya “Pastor” ta amshir, saka toklang tenzüker ajak dena lir ta bilema züngdaktsünür) Kari ashi, ABAM  Executive Council akümba yimya yagi clergy-centred ta sayur. Tat. agi, ABAM President Pastor dang agir aser members rongnung 70% shi pastors. Iba yagi ABAM ya Pastors’ Association amai dang kümogo ta sayur. Ano kari ashi, ABAM aser arogo nung lay leaders kanga ajema akümer. Anungji Baptist distinctive, “Tamanger ajak putir” ta noktakba nungi tera pila-a aor. Akhi putu Baptist arogo nung tetsür, tebur, sensaker ta kecha melemsai shilem agia aru, saka tanü Ao lima arogo tebur arogo amai dang kümogo. Tetsür pastor mali, arogo kar nung tetsür ka-ana shimokba dak alaka arogo aika nung tetsür deacon mali. Ao arogo ya male clergy-centred church küma aor asü masü? Lai tesayuba dak ajemdaker arogo ya nüburtemi akümba arogo aser parnok Tsüngrem o agi mesütsü Pastor ya shimteter.  Anungji nüburtem/arogo (employer) aser Pastor (employee) lirumetema telemtetba agiba committee ajak nung alitsüla aser yamaji arogo lenisüba bener aotsüla.

Deacon shimdang tashi mait kar lemsatep. Baptist Arogo nung deacon menden ya kanga tongtibang kechiaser arogo ka nung sentakba ketdangsüba ajak deacon menden nung telemtetba agir.  Anungji ochishir, Khrista metetba taküm aser lokti bendanga agüja tenzüktsüba pur nüngdak. Tzükong, yim, kiyong, kidong aser takar hisab nung shimra, arogo ochi kuli samatsü. Tanü nüburtemi Pastor-centred ta ashibaji telemtetba ajak pastor-i mulungba hisab nung dang arogo aika anir aor kechiaser tenzüker aika Pastor bilemba nung hau ta asütsü pur dang repranga shimba angur.  Kari ashi, “Pa/la ya kü kübok litettsüa, pa/la tazüngba kü den tilaba, pa/la sempet kü den tera tekübokba, pa/la aniokra nüburi nisa tushitsü aser külemtsü, pa/la dak ni ama tanela sempet maket, pa/la aitra ola madoktsü, pa/la lira kü o dang teti agitsü, a.a. Anungji, iba ama arogoji clergy-centric küma aor. Baptist arogo nung deacon shimba yimya ka khen reprangshitsü nüngdak. Kokra Deacon shimdang toklang tenzüker tebang maitsüla aser madentsüla kechiaser idaki politics aikasa asayar ta tebilemba lemsatep.

Sen ajanga mapa aika inyakteter, saka ter shilem aser amangbapur nüktzü tenla ochi shia ketdang mesüra, nüburtemi arogo dak tamang makatettsü. Lim arogo kar nung rongsen tali akaba ajanga Mungdangi lemtetba hau ta maliba, arogo tului kechi ashir ibaji atsünga telemtetba agiba ajanga Arogo/Mungdang tashi mait akümer ta metettsüla. Yamaji meinyakra budget magütsütsü ta jembiba tashi lir. Itasen rural aser urban tepila ajanga arogo kar “inferior” aser kar “superior” ta reprangba/bilemba ataloka arur. Ibaji ajanga clergy-centred church ta dang masü “urban-clergy-control-church” akümtsü mapang kadi arutsü. Yongji equitable resource sharing ya koda sür arogo nung bener arutettsü Mungdangi shisadangtsüla.

Taoba mapang Putir sobutsü indang YSS nung lemsatepogo.  Baptist arogo Putir sobutsü magitsü noktangbaji clergy-centred inyakyim anema lir. Asen tetsü-tebou mapang kin-kidong sobutsü bentet-benteta ayuba ama, Tejen aser Tasen Lai putu nunga sobutsü ya kanga benteta amshi. Chuba, chubatsür, takar, putir süoshi sentsü aser quality balala aben aser parnoki sobubatemji sensakeri sobutsü memela; tsüngsema sensakeri asemtsü memela. Süoshi aser tsüngsem ya symbol of power, status tsütsü amshi. “Alar” yabo category balaka nung amshi. Parnokbo sentsü tanak (Ao o nung anemsü ta meyipzüka angur) dang abendaktsü. Süoshi jagi shirnok alar aji sayu.  Alar süoshiji kecha style mali pungdang amai dang, aser teberem nung lisü agi alener mapa inyak. Kechiba lisüji amshi ta süra (a) nüngdakdang khu alena bener aotsü (b) tashi mangar dak iba lisü jagi areptsü (c) onsara tashi mangara iba lisü jagi alener ayu.  Anungji alartemi teberem nung belt inokba amai alenloker mapa inyak.

Anungji, Tasen Lai nung Khrista lar ta asüba iba concept nungi adok. Yisui ni tenzükdaktsütsü masü saka tenzüktsü aru ta asüba ya-a iba background nung angatettsüla. Arogo ya power-centred masü, alar ama tenzüktsu jatetba telok ka. Laishiba nung arogo ya “people-centred” talisa jentoka aliba pur tenzüktsü aser temenen pur tekümtet lenmang dangi anitsü jatet ta metetdi.

Arogo lanu (early church) rishikangshiba putu nung nütsüngtemi aser tamanger teloki alari ama temesüng süoshi abenba angur. Khrista züi alangzükba tamaitsü, temeshi, Khrista lar, aser tepsetnüra tepsetang ta teka-tetsüng alener tasü itta ataba aser Shia aruba Khrista kuli asüba tasütait mapa kuli tangatetba nung putir sobutsü ya amshi. Yamaji Yisu Khrista nütsüng karbo parnoki bena aliba lisü agi tsüngseta südaktsüba otsü nung azünger. Anungji, original concept ya kanga tetezü tarok. Saka lia lia putir sobutsü ya misuse asü, it became a symbol of power and hierarchy. Putir sü abeneri dang sarasadem asütsü akok, Lai azüngtsü aser ratettsütsü akok ta Lai tiyazü ratetja putirtem takar, capitalist, feudal lords, political power, nüktapangta, machi-majemtsü lar akümba, sensaker hau ta mali temenen jenti jateta adok. Sen agi putir menden alitep kechiaser putirtemi lokti nung tashi tulu amshi. Anungji, Reformation mapang putir inyakyim anema apuso aser  parnoki Lai dak ajemdaker “Priesthood of all believers” sayu.  Tamanger ajak putir ka ka, anungji Putir subotsü mabentsü sayu. Tamangertem Yisu Khristai züi alangzükogo, Khrista dak amangba ajanga tekümtet, Laishibai sayuba benshiba agi tekümtet, putir ajanga dang masü amangba pur ajaki sarasademtsü akok, Khrista kuli asütsu akok ta apusoa putir süoshi shisar mi nung rungtok. Yamaji lia aruba ajanga Baptist-i tanü tashi putir sobutsü mesobur, “clergy-centred” church masü “congregational-centred” church ta ajar aser iba inyakyim benshir.  Ao arogotem “clergy-centred” church atsünga oya lira kümdangshidi ta ayongzüker.

*****