Wati Longchar (Ekhranipathar)

Tenzükbaji kechi

“Tenzüker” ta asüba ya tangatetba balala nung amshir. Nüchiso bushir dang “linük tenzüker” ta ajar; Government office balala nung inyaker dang “government kilir (servant)” ta ajar;  Bangdak yimsüsür dang “public servant”; NGOs balala nung inyaker dang “social worker”, temang anema aliba mapa balala nung inyaker dang “health worker”. Yamaji nübur tenzükba maparen balala aika nüngja balala aika ashitsü akok. Mapa balala inyakba ajanga nübur tenzüktsü shimtetbaji maongka tulu, temoatsü ta bilemtsüla. Ibai nüburtem madak tashi amshitsü asoshi shimba masü, saka khuret ka amai agizüktsüla. Tenzüker kaji nüburtemi shimer, aser aji Tsüngremer temoatsü. Lenir shirnoki ibai Tsüngremer temoatsü ta angatetta ajemalua tenzükdir temoatsü, saka shibai iba maongka tashiyim aser ochimashi amshia nüburtem madak amshir parnok Tsüngremi jentoktsü. Yamaji alima yimli putu balala nung laoba otsü nung azünger.

Arogo nung Tenzüker Jakla

Arogo nung tenzüker dang “Tsüngrem lar” ta ajar. Arogo ya alima lokti tentet ka amai masü, aser tenzükba maparen ya-a alima lokti tentet denji metemdangtsü makok. Arogo yabo Khrista zü agi alangzükba purtemi akümba telok ka lir. Khristai sayuba ama alima dang kangki apur iba temenen lima nung ochi indang külisür asütsü Tsüngremi jatet. Kangki apuba, tetezü tilatiba akümba, tangar atema bendanga agütsüba, ochi atema tatem tashi noktaktetba lar. Iba jaklaji makara arogo nung tenzüktsü malang ta angatetdi.

Yisui alar indangji yamaji ashir, “Atangji Nisung Chir-a sünga pei tenzükdaktsütsü atema masü, saka tenzüktsü aser aika alang pei taküm agütsütsü aru.” Mark 10:45. Konang-naroküm bushia, tashi toktepa, sentsü sayutepa inyakba telok ka masü. Arogo nung tenzüktsü ajaba purtemji Yisu Khristai sayuba ama kangki apur iba temenen lima nung ochi indang kuli asütsü Tsüngremi jatet.  Yisui kilir aser alar ka ama nütsüngtem tetsüng shitroktsüba jagi pa tenzükba mapaji kilir aser alar mapa ama lir ta tatishitsü sayuba lir. Anungji, arogo nung kobala tenzükba mapa südir süang – chowkidar nungi pastor, deacon, committee balala nung tenzüker ajak “kangki” aser “alar akümba” tangatetba nung tenzüktsüla.

Yisu Khristiai sayuba “tenzukba” aser tanü Ao arogotem nung tenzükba jenjanga asadanga temelenshi adoktsü nüngdaker. Tanü urban area nung dang Govt-i development ajak agütsüba ajanga yimtsüng nung tenzüknür mali aser rural-urban telemsa aser tenzükba jenjang nung telemsa tulu adoka lir.  Ano tanü “individualistic aser consumeristic” lima nung nisung ajak jangratema alitsü jenjang bushir.  Kasa degree azüng, saka town arogo tenzüker aser yimtsüng arogo nung tenzüker itasen, facility kanga dang tepila tulu. Ano tenzükeri angatetaka, tanuri aikadi mangatetba ajanga mapa nung tamakok angutsüsa akümer. Anungji, town nung tenzüktsü rakteper aser yangji mapa ngutetbaji jenjang tuluka ajangzük amai bilemer. Iba tebilemtsü ya Mungdangi aser nüburtemi aroka magira, tarutsü nung tebilemtsü aika ajurutsü.

Amangbapur ajak Tenzüker kaka

Baptist arogoi “amangbapur ajak putir kaka” ta agizüker.  Amangpur ajak – na aser ni – kongsa lidir, kechi inyakdir yangji Tsüngremi jatetba tenzüker ama taküm alitsü takangba ka  ta angatettsüla. Tetezü putiri dang masü (toklang tenzükertemi dang masü), amangbapur ajaki Tsüngrem indang ochi kulisüba nung shilem agitsüla ta sayur. Tsüngremi nungloktsüba tenzükba mapa nung, shiba dak sempet lir, shibai ochi nung tasü itta kuli süteter, shibai/ni Khristaji kü kümtetdakba ta nangzükteter aser taküm bendanga agütsütsü mulungteter, parnokji pastor, deacon, missionary, mission board aser committee balala nung tenzükdaktsütsüla. Kin-kidong, anük-abang, tzükong, yim, sector balala, tebur-tetsür ta masü, Yisu Khrista tiyongtsü südaktsür shibai liteter, pa/laji tenzükba mapa nung shimtsüla. Arogo nung pastor, ABAM nung Ex. Secretary, department balala nung secretary tetsür-tebur ta tebendang mali shimtsüla. Khrista züi alangzükba telok rongnung tetsür-tebur, tanur-tain, takar-sensaker ta tebendang mali, Khrista nung ajak kasa dang. Tenzükba mapa ya teburtem atema balaka wazüka ayuba masü, saka Tsungrem nem bendanga agütsür atema ta metetdi. Ya metetdi: Tenzükbaji Tsüngrem nungi tenzük, aser tematiba Tsüngrem tajaba, anungji meimchir shingaia shinga Tsüngrem ochi kulisüba nungi noktangtsü makok.

Hau, Baptist arogoi Tsüngremer temeshi mapa ana – Tzüsenba aser Kibuba Benjong – achayangtsü atema tenzüker kar balala meshiteta ayur, saka parnokji temaba jenjang mapa balaka ta mangatettsuba. Ya Tsüngremer temeshi mapa inyaktsü balaka meshiteta khuret  agütsür ayuba aser ajaki temeshi mapa ta akümtsübua inyakba mapa ka ta angatetdi.

Ano asenoki metettsüba kaji arogo ya building tajung ka süteta alibaji masü, mesüra tambur ishikadi nütsüng ajunga asoshi telemtetba agiba telok ka masü. Project aika aser rongsen aika bank nung rizünga akabajia masü, saka timtemer yariba, sama-a aliba pur tekümtet lenmang sayuba, aser lokti ajungkettsü tenyaba mapa balala inyaktsü nungloktsü. Ibai Khrista dak amanger teloki kümtetba arogo. Ya sobaliba telok tentet ka masü nungji, aser sobaliba ozüng amshia azüoka ayutsüba telok ka masü, saka Laishibai kechi sayur iba amaji arogo tenzükba mapangren  ajak bener aotsüla. Aji Lai kuli.

Arogo Rongsen ketdangsüba

Arogo rongsen kechi nungi arur? Ter shilem aser temoatsü tenla ajanga arogo maparen ajak ketdang süa bener aor. Ya Tsüngrem meyong aser Tsüngremi tenyaba mapa inyaktsü tamangeri agütsür. Kodang tenzükertemi item rongsen timi ketdang mesülir, nüburtem tenzüker dang temulung malemer. Kechiba alimai arogo aküm tsübur?  Alimai ochiba tsübur. Tsüngremji ochi Tsüngrem lir. Iba ochi kimungji arogo tera yanger noktaka lir. Rongsen ketdangsüba nung ochi kuli mesütetra, arogoji tamendakdak lung laogo ta metettsüla. Arogo tenzükertemi rongsen ketdangsuba nung ochi kuli mesütetra, arogoji alima lokti tentet ka amai dang akümtsü aser sentepi arunür malitsü. Item lenir kübok arogo rajang akümtsü. Koba arogo nungsa arogo rongsen timi ketdang masüba ajitetra, iba ken-o mebentet tashi tenzüker ka mapa nung anena atatsüla aser tapet alima yimden, tat. agi, special committee, mesura FIR agüja shiba tai, shiba shitak aser koma metongshia ao nung tajungba asütsü telemtetba tajung agia arogo inyakyim akangshitsüla.

Tanü alima rajang kümdaktsüba tashitak tulutibaji ochimashi ya lir. Aikadi bilemer sen dang lirbo teperi, aser terenlok mapa ajak inyaktettsü, saka aji  tangatetba tai. Ochi agi dang terenlok bener arutsütsü akok ta angatetdi. Tat. agi., Nagaland ruling party nung liakasa, sen aika centre nungi yokakasa, lenir aser nüburi ochi meinyakba ajanga teraksa aika bener arutsüba angur. Nagaland teküboktiba jenjang nung alibaji ochimashi ajanga ta kuli sayur. Ochi nung rongsen ketdangsüba ajanga dang Nagaland yanglushitettsü.

Temalen ashiba ama, ochi nung rongsen ketdang sütet nung dang arogo tejakleni otettsü. Tamangertemi Tsüngrem nem ter shilem aser tamang tenla agütsür. Anungji arogo rongsen ajakji Tsüngrem meyong, aser ochi nung achayangtsü arogo tenzüker nem dang nungloktsü. Tenzükeri arogo rongsen timi achaayang masübaji Tsüngrem meyong rongsen timi ketdang masüba lir.  Meimchiri sen kanga meimer aser ochi mashi inyaker atar. Arogoji temeshi süaka, meimchiri dang inyaker asünung rongsen amshiyim telatet tajangja melira, lendong aika ajurutsü aser tenzükba kuli maka akümtsü. Ao arogotem nung rongsen amshiyim tim mesüi amshiba aika ataloka arudagi. ABAM nung, lim arogotem aika nung tenzükertemi tim mesüi rongsen amshiba, kibok nung dang “adjust” sür ola madok yutsüba osang aika angashir. Ibala Tsügremer rongsen memerüki amshiba ajanga nüburtem temulung yirur.  Arogo rongsen amshiba nung nütsüng nüburtemi temulung melemtetra ter shilem aser tamang tenla agütsüba ajema akümtsü. Item tenzüker ya anenerang ter shilem aser tenla agütsütsü ta nüburi jembitsü aser nüburtem tanela nung yirutsü. Arogo nung tanü sen amshiyim reprangshitsü kanga nüngdaka lir.

Tanü cyber, digital world putu joko “cyber office” kümteta financial transaction kanga merüka transparent süa bener aoba putu, saka Ao arogotem nung akhi putu inyaka aruba sen amshiyim nungi mepila. Arogo nung rongsen koda ochi nung ketdang asütsü, accounting management arogo nung toklang tenzüker ajak nüngdak. Ya theory dang masü, saka practical den angazüktsü nüngdak. Mungdangi küm ana-asem ka iba training nungji temulung agütsü nung temelenshi aika bener arutsü.

*****