25 Mongoya ACCC tir, Alemkaba-i Lijaba Lijen Unit pur Bhavan mesemba tamaitsü Congress wako atsüketa yutsür telen aser kongsang balala nungi Congress ketdangsürtem telok noksa tangokba ka angur. Mokokchung, 22nd February, 2025  (nokinketer.in) 
25 Mongoya ACCC President, Alemkabai Lijaba Lijen Unit Congress Bhavan mesemtetba sentong nung party flag atsükettsüba mapang tangokba noksa nung angur. 22nd February, 2025 (nokinketer.in)

25 Mongoya Assembly Constituency Congress Committee (ACCC) Lijaba Lijen Unit pur Congress Bhavan asütsü asoshi Lijaba Lijen Ward, Mokokchung nung alir Wb. Lanutemjen’er ki mesemtetogo. Bhavan lapokba tamaitsü 25 Mongoya ACCC tir, Alemkaba Jamir-i Congress wako meraketa atsüketa yutsüogo.

                Alemkaba-i iba sentong nung jembidang, pei sasa ulua bilemba aser asüküm jakla ajanga tanü lokti aika rajang kümdaktsür aser iba yimya aketba jagi asenok tsüngta tepila aser rarabangsen dang tali dendaktsür, iba shisatsü ali tashi asenok tejakleni maotsü. Anungji, iba yimyaji intoker kadi ka aküm tsübuteptsüla aser ajemalurtemji Tsüngremia moatsür, ta ashi.

                Political party nung tera (grass root)-ji unit-tem ya lir, unit-tem tashi itta alinung dang A/C ji tashi aittsü, aser A/C tashi ait nung dang district level tashi aittsü aser yamaji tematiba jenjang nunga tashi itta atutsü. Anungji, unit nung meranga inyaktsü asoshi pai ajungshia liasü.

                2028 election nungji asenok lungjemer 25 Mongoya Assembly Constituency nungi Congress candidate tetemsü ka shima takok anguba den Nagaland nung ruling government bener arutsü asoshi nükla yur tang nungi meranga inyaktsü asoshi paisa tayongzükba agütsü.

                BJP ya Naga nunger asoshibo mapet, asenok asoshibo tapet political party ji Congress dang lir, kechiaser Congress-i dang tamangba yimsü ajak akümtsübur aser democratic yimsüsüba dak ajemdaker maparen ajak inyaksangshir, anungji, Naga nungeri ya angatettsüla, ta 25 Mongoya ACCC tirisa metetdaktsü.

                Unit nung alirtemi mapa meranga inyakba ajanga Mokokchung District kübok A/C balala rongnung 25 Mongoya ACCC jenjang tajungtiba nung lir, aji oda, tanü Lijaba Lijen nung Congress Bhavan mesemtetba ajanga ano Congress party tali tashi itta akümtsü imlar, ta paisa shisem.

                Iba sentong nung DCC Jt. Secretary, Alemchiba-i mapang tatsüka agidang, tanü Nagaland Legislative Assembly nung Congress MLA kata mali, saka MP kabo lir. Aji oda, asenok telungjem nung putepa lira tarutsü nung asenoki takok angutsü imlar, ta metetdaktsü.

                Sentong nung 25 Mongoya ACCC Lijaba Lijen Unit General Secretary, J. Manen menden liasü. Lijaba Lijen Unit President, Imtitemsü-i tarur pela-a agizükba o jembi. MTBA deacon Impang den temoatsü meshia sarasademer sentong tenzük aser executive member, N. Waten-i tepela o lemsatep. Iba sentong nung DCC, ACCC, tanga unit nungia densema Lijaba Lijen Unit kongsang balala nungi ketdangsürtem aden.