Mokokchung Ao Officers’ Telongjem (MAOT) den külem sür Ao Baptist Arogo Mungdang (ABAM)-i ‘the Art of Life in Fullness’ ta sür sentong ka 24th – 26th Feb, 2024 anogo asemnü ABAM Resource Centre Kangtsüng (Aopenzü) nung ayongzüka kaogo. Iba sentong nung Ao arogo balala nungi tenzüker parnok 40 shi adenshia shisatsü balala angazük.
Iba sentong ya tongtibangsa arogo tenzükertem ya rongketzüng nung tangar memenep, anungji, shisatsü balala angazükba den peisasa mapa meranga inyaktsü, angazüktsü aser ibaji pei santem dang sayutsü aser parnoki mesayutetra, item shisatsü yabo pei arogo/yim asoshi tongtibang asütsü ta bilemra, MAOT teyari agia itemji inyaka aotsü, ta sentong achayanger ABAM Finance & Property Secretary, Maong Jamir-i osangbener den jembidang metetdaktsü.
Meimchir taginüba ya tanela (spiritual) kisüng masü, saka shimang aser rongsenketzüng nüngdaktema lir, saka tanü maparen teimbaka tanela dak dang rangloker dang inyaker. Anungji, kechisarena lirumedema aintsü tangatetba (holistic approach) nung iba sentong ya ayongba lir. Iba sentong ya 2023 nungto ABAM-i dang ayonga mezüngren agiogo aser tang ya tanabenren MAOT den yaritepa akar, ta pai ashi.
Arogo ya sabang tajungtiba ka lir, aji oda, arogo tenzüker o sorkar ketdangsürtem külemi lungjemer inyakba ajanga mapa tulu takok ngua inyaktettsü tamang akar, ta paisa shisem.
Alima renloktsü asoshi UN-i koba nükjidong ka ‘UN sustainable goals’ ta sür onük 17 yanglua lir, iba dakji ajemdaker taküm nung kechisarena tajungtiba renloka bener aotsü asoshi tim tangazüktsü angazükdaktsütsü aser tensa den sütepa teyakyak lenir ka kümdaktsütsü teimla nung iba sentong ya ABAM den külem sür ayongzükba lir, ta I. Lipokonen Jamir, Jt. Director SAR & MAOT tiri metetdaktsü.
Sentong ka nung Dr. Sarendi Walling, ACTO, Animal Science, KVK, Mokokchung-i “livestock farming” onük nung jembidang, asen lima dak apet nashi, ak, an, angoh koma metsütsü, ki tasazük koda yanglutsü, anepalubayim aser kiset shiruru balala meyoktepa metsüba tasa den parnok nem chiyungtsü agütsübayim, mol yangluba yimya, shiruru metsüa ayokba ajanga sen koma tajangzük angur, aser shiruru metsüba yimya tapu balala sayua liasü.
Ali junga anepalutsü (soil health) tongtibang indang Ms. Imtisenla, ACTO (Agronomy) KVK, Mokokchung-i jembidang, ali ya taküm lir, ali mali nungbo asenok kecha mesütettsü, ali junga ali nung dang nisung-a, shiruru-a, süngdonglidong aser tsünüsembong tapu ajak ajungtsü, ta ashi. Ali junga kümdaktsütsü asoshi melentepa tsünüba, tu/süngolio balala amshia ali koda junga kümdaktsütsü ta asüba nung teinyaktsü kar lemsatep.
Tanü joko ali tendangba kol asen atep nung lir aser ali tendangtsübaji kanga tongtibang, anungji, tsünüsembong meyokdang ali tama tendangtsüla aser ali tendangba taah ji tasakbo masü aser mapanga talangka magir, ta lai ashi. Laisa ali tendangtsü atema koma inyaker, itemji tatongi rasa-a ashi.
Ano sentong ka nung, Mr. Tsulensa Jamir, Inspector of Co-operative Societies, (ARCS) Mokokchung-i co-operative society ji koda tongtibang ta asüba onük nung jembidang, Naga nunger aikadi co-operative society ya tai nung angateta lir, anungji, iba mulungsentsüji tama melenshitsüla, ta metetdaktsü.
Mokokchung nung registered co-operative society 900 dak tali lir, saka item rongnung junga aoba society 20 shiang ta süra ashitsü tasak kümogo, Nagaland nung ochi shia aser meranga inyaker society kanga apara, ta pai society aika tamakok anguba kuli kar ashi. Paisa Tuli Area Fishery Cooperative Farmers Producers Organization Ltd. aser Ao Trading Cooperative Society Ltd., Mokokchung nadi nüburtem atema mapa tajung inyakba kar lemsatep.
Joko yakta society maparen ajak database yimya nung inyaka aotsü, anungji, Nagaland nung mapa meinyakba society ajak katiyonga aotsü mapang arudar, ta paisa tekümdaktsü o ka ashi. Politician-temi vote aginüdang cooperative society by-laws bener arua lemtsüba jagi asen lima majunger, ta paisa metetdaktsü. Paisa cooperative society-i mapatong balala tenzüktsü aliba aser iba maongkatem agitsü asoshi ajungshia liasü.
Anogo asem nü amungba mapang – package and practices of coffee cultivation, integrated fish farming, introduction to the art of life in fullness, social welfare schemes: holistic development, vegetables & mushroom farming, introduction to sustainable agriculture and beyond, skill & jobs, transformative industrialization schemes & export avenues aser ano tanga onük balala den Tsüngrem o densema shisalen sayur balala nungi angazüka liasü.
The Nokinketer 