Union Minister of State for Civil Aviation & Cooperation, Govt. of India, Murlidhar Mohol-i Mokokchung semdanga sorkar ketdangsür tokolakpur (HoDs) aser mulungtet telok balala den 3rd March, 2025 nü sensaksem senden ka DC conference hall nung menogo. Iba senden ya tongtibangsa central sarkari senotsü teyari yokba mapatem koma inyakdar ta asüba nung mapang teimba intoka sensaksema liasü.
Iba senden nung Murlidhar Mohol-i mapang tatsüka agidang, pa asoshi ibai Nagaland-i mezüngbuba arur, aji süaka, yangi alirtemi pa kanga junga agizükba den junga anepaluba ajanga pai pa tangalen nungi aru ama mebilemer, ta pelaba lemsatep.
Modi sarkari küm 10 shi yimsü süa arudang, iba region atema “East Act Policy” dak rangloker terenlok tsütsü temulung agüja arur aser kümshi senotsü teimba teimba lemzükja arudar, aser ano lenmangtem, railway aser airport mapatongtem teinyakdak aika lir aser tuluba moraloka aotsü sentong aliba pai ashi.
State sarkar-i central mapatong aser sentongtem takok ngua inyakba den Mokokchung deputy commissioner-i anir Superintendent of Police aser sarkar ketdangsürtemi yimsüsüba aser terenlok mapatem nendaka inyakba asoshi paisa pelaba metetdaktsü.
Yaküm airport centre dak sentakba atema koba proposal yoka lir, “central sarkari itemji reprangtsü”, ta pai teimla o ka shiogo. Central o state sarkar na lungjemer “double-engine” amato nübur tenzükba mapa tajungtiba aser terajemba nung inyaktsü pai ashi.
Tanü iba sensaksem senden akaba nung ajemdaker tang teinyakdak aser tarutsü mapatongtemji asayamayanga nüngdaktemji inyaka aotsü, ta paisa shisem.
Central sarkar meyonger balalai Northeast state-tem semdangba ya terenlok maparen tashi itta bener aotsü asoshi lir, “onok nükjidongji yimsüsüba tajung aser nüburtem atema taküm libaliru tajung agütsütsü asoshi lir”, ta paisa metetdaktsü.
Mokokchung aser ano tanga district kar nung heliport maparen yakta tenzüktsü asoshi maparen tatemleni arudar ta minister-bai Ungma lushi nung heliport yanglutsü koba tesem mekazüka lir (proposed site), iba tesem semdangba mapang metetdaktsü. Minister of State for civil aviation-i Nagaland nung nüngdakbatem inyaktsü asoshi akokba maparen ajak nung yariteptsü aser nungittsü mulunga aliba paisa shisem.
Mokokchung DC, Thsuvisie Phoji, shiba iba senden nung menden liasü, pai Union Minister of State, Murlidhar Mohol dang Nagaland-i mezüngbuba aruba den talisa Mokokchung district semdangtsü shimba asoshi pelaba metetdaktsü. Mokokchung ya Nagaland nung tajungtiba district rongnung ka ta züngshir, iba district ya state aser central sarkar sentong mesüra mapatong balala takok ngua inyakba rongnung tematiba nung lir, ta Mokokchung DC-isa metetdaktsü. District nüburtemji tenendak, temerang, bendanga agüja inyakertem lir, Nagaland nung education iba district nung mezüng tenzük aser yangi nungi sarkar ketdangsür aser alima lenir jenti adokba indang paisa lemsatep.
Mokokchung ITI Principal, Er. T. Imlisünep Ao-i power point ajanga Mokokchung district kübok central sarkar-i teyari yokba nungi department balalai terenlok mapatong balala inyakba indang tatongi lemsatep.
Iba sentong nung Watsü Mungdang tir, S. Arenla Longkumeri tarur ajak pela-a agizükba den iba maongka ka agia MoS Murlidhar Mohol dang Mokokchung nung chopper service regular asütsü atema, Mokokchung nung tongtibang nüngdakbatem tang aliba dang nungi jenjang tajungba kümdaktsütsü (infrastructure enhancement) aser nüburtem rongsenketzüng tsütsü jenjang ajungkettsü (skill development & economic empowerment) item onük asem (3) nungji ajemdaker inyakdaktsünüba kar tezüluba nung agütsü.
Murlidhar Mohol-i Ungma lushi nung heliport yanglutsü atema agüja aliba tesem (proposed site) semdang, iba sülen Marepkong Ward, Mokokchung nung aliba Mini Dairy Cooperative Plant semdang. Aji sür ABAM Impur, Mopungchuket nung Etiben Tower & Sungkotenem park semdanga liasü. Pa ya March 3 tashi Mokokchung nung amungtsü aser March 4 nü meyiptsü.
*****
The Nokinketer 