(Mokokchung DC tasen Ajit Kumar Verma IAS aruogo)
Mokokchung Deputy Commissioner, Thsuvisie Phoji NCS den tepila sentong yangi DC conference hall nung temenungratsüka agiogo. Pa ya Mokokchung nung DC küm ka sür ita 11 aser anogo 5 inyaker Department of Personnel & Administrative Reforms nung Joint Secretary inyaktsü aor. Pa melena Mokokchung Deputy Commissioner tasen Ajit Kumar Verma IAS aruogo.
Iba sentong nung Mokokchung district nung aliba HoD-tem, sub-division aser administrative circle nungi administrator-tem, Ao Senden-i anir mulungtet balala, GB association, Mokokchung Municipal Council aser ano telok balalai pa nem tetushi agüja senpet balala agi senpettsü.
Thsuvisie Phoji-i tepila o jembidang, Mokokchung nungi legislator 10 den Dimapur nungi Aor legislator ka aser Nagaland Lok Sabha MP shiba iba district nungi lir, parnok ajak den par külem administrator-tem, staff-tem, HoDs (state & central), Sr. SP-i anir police ajak, CSO-tem, IRCS, BSG, ano lokti balala aser Mokokchung nüburtemi nungitba den temeim mapa agi yaria aküm aser shisatsü agütsüba ajanga kecha mesenseni tasü itta inyakogo, ta telok temang dang pelaba metetdaktsü.
“Ni kecha balaka meinyak saka tanü nenoki ni yamai tushiba ya kü dak malangba ka lir”, ta ashi. “Ni kechi inyakogo, ibaji nenok ajungba ajanga lir, nenok mapa tajungji kü dak angurba lir”, ta pai shisem. Meimchir dang asünung shinga tabensaba mali, anungji, tashimait mesüra metokmeperi kar danga inyaka lira tatok agütsütsü asoshi paisa mepishi.
Pa EAC kümer mezüng posting-ji Mangkolemba nung liasü, aser district nungbo tang DC inyakba ya tatembang asütsüa akok, anungji, “ni ya kanga tia taka officer rongnung ka asütsü aser nenok temeim aser anepaluba ni kodanga mamatoktsü ”, ta pai pelaba lemsatep. “Ni yangi nungi pilar koleni odir oaka, nenoki tang koma kü den temeim benshia arur yamaji teti lidaktsünür”, ta paisa mepishia liasü. T. Phoji ya Aor anükabang ka lir.
DC tasen arusang Ajit Kumar Verma-ia mapang tatsüka agidang, pa indang mezüng posting-ji Mokokchung lir, anungji, pa atema iba yimti ya tasen masü aser pa yangi tanaben arushiba ya tia taka aser jangratema bilemer, ta ashi.
DC ya district nung tokolak ka dang, DC kisüngi kecha mesütettsü, district araka aotsü asoshi külemi lungjemer (team work) shisa obang ka sür inyaktsübaji tongtibang lir. Anungji, taoba DC den nenoki koda amalitepa aru, kasaji pa dena lidaktsünür, ta pai mepishia metetdaktsü.
Nagaland nung mulungtet telok ya kanga tongtibang lir, talisa iba district nung mulung teloktemji kanga tashi tait, anungji, nüburi aginüba ama inyaktettsüsa nenok nungi amalitep maneni akanger, ta paisa shisem.
2016 batch IAS officer Ajit Kumar Verma, ya Mon nung Deputy Commissioner küm 3 inyaker aruba lir. Pa ya tamalen Mokokchung nung Assistant Commissioner inyak; Wokha nung Sub-Divisional Officer (C); Tuensang nung Sub-Divisional Officer (C) aser Additional Deputy Commissioner inyaker külen Mon DC marudang Niuland DC khen inyaker tang Mokokchungi arur.
Tanü iba sentong nung salem o tatsütsü jembi – Mokokchung District GB Association, Mokokchung district kübok yim ajak tenüng nung Khensa Village Council Chairman, CSOs tenüng nung Ao Senden, Mokokchung district ULBs tenüng nung MMC chairman, DC staff tenüng nung PA to DC Alemtetba, DPDB & HoDs tenüng nung Er. Philip, Admin Officers tenüng nung ADC Mangkolemba Moakümzük Tzüdir, aser police meyonga Sr. SP-i jembi. Iba sentong nung Mokokchung ADC Hq. Chumlamo Humtsoe menden liasü.
The Nokinketer 