Mokokchung town nung aliba Kichutip Sporting Association (KSA)-i taküm mezüngbuba arishi küm 15 tekübok pur asoshi Nagaland Open Futsal Tournament 2025 “rise up” omen dak rangloker Mujabi Futsal Turf, Salangtem ward, Mokokchung nung anogo asem 1st – 3rd July, 2025 tashi ayongzüktsü renemdaki, ta KSA Tir, Imtichiba Kichu-i Arok Salang Kichutip nung osangbener senden ka nung jembidang metetdaktsü.
Kichutip Sporting Association tenzüker 2023 küm Silver Jubilee amungdang, lanurtem saisabong tsütsü tangar menepa adoktsütsü nükla yur mapatong kar tenzüktsü jubilee bangzüng renema ayu. Ibaji mapa küma iba sentong ya lanur dak rangloker ayongtsü bangjemtep, ta Futsal Tournament Convenor, Tinukaba-i metetdaktsü. 1st -3rd July ya school tanurtem mei sodi apir shimba lir.
Reprangdangra taintem asayatsü atemabo sabang karbo lir, saka lanurtem atemabo asayamung ya kanga apara, iyongji, parnok nem sabang lapokja tang asoshi under 15 dak rangloker akar, saka meilongi ano under 13 mesüra iba tekübokjia ayongtsü tebilemba lir, ta Convenor-isa inyaka aotsü sentong kar lemsatep. Iba asayamung ya Mokokchung District Football Association aküm kübok agitsüba lir, ta paisa shisem.
Iba asayamung nung senpet sen ajak senteper ₹ 80,000/- (eighty thousand) lir. Takoker mezüngbuba, tanabuba aser semifinal tashi atonger ana den ano nija senpet kar shima senpettsütsü. Iba asayamung nung telok balala den kija/kibongtemi teyari balala agüja shilem agitsüba lir, ta parnokisa metetdaktsü.
Tsükdakradang kecha majurura tarutsü nung iba asayamung ya “running trophy” ka amai kümshi ayongtsü tejangraba lir. Tang ayongtsü aliba asayamung nung ya Mokokchung nungi dang masü tanga district nungia team karbo arutsü imladar, ta parnokisa shisem.
1998 küm Kichutip Sporting Association tenzüker küm 27 shi arudang saisabong luyim tsütsü takok anguba aika lir, item rongnung KSA züngsem karibo National aser International level tongteta shilem agiba otsü tejangja lir.
Iba asayamung nung shilem agitsü jangrartemi item tesem nungi form agizüktsü akok – Aor Coffee (3rd Floor MCCI building, Arkong ward), Fix Your Fixation (Arkong Ward, Yongpang Market anasa), Mokokchung Sports Store (MMC Shopping Mall anasa) aser G-Sports (Magnus Hotel anasa).
Registration fee senpak 2000/- alitsü aser form meyiptsütsü tatembang anogoji 15th June, 2025 asütsü. Osang tajung kaji 2010 January 1 sür tema asortembo iba asayamung nung shilem agitettsü, ta tayongertemi metetdaktsüogo. Kari danga asayamung dak sentakba osangtsüsang tejangjaba metetnüra iba mobile No. 6009033578/9615115795 ajanga tayongertem den jembitettsü.
*****
The Nokinketer 