Nationalist Democratic Progressive Party (NDPP) Mokokchung Region kübok Agri & Allied Organization-i aluyimba (integrated farming) dak sentakba nung shisatokden sentong ka 15th May, 2025 nü parnok region office nung ayongzüka kaogo. Iba sentong nung Mokokchung Region kübok constituency 10 nungi party pur parnok 50 dak tali arua aden.
Sentong nung NDPP Mokokchung Region Agri & Allied Organization Tir, Nüngsang Ao-i jembidang, iba sentong ya party pur tashi itta lungjema aotsü asoshi dang masü tongtibangsa grass root nung alirtem tangar dak metaloka meli-i alu meranga ayimtsü, pei sasa tepok sünga alitsü aser iba ajanga asen lima rongsenketzüng jenjang ajungtsü nükjidong yur ayongba lir, ta metetdaktsü.
Nübu tsüka training nungbo aden saka tangazükba kecha melira amajok dang asütsü, anungji, shisalen sayurtemi kechisa sayudir item tangazükbaji mapa küma inyaktsü merangang, ta pai ajungshia liasü.
Taoba mapangbo Agri & allied ya committee ka dang liasü, saka ibai ajungkettsü tim ta angateta iba frontal organization ka kümdaktsüogo. Talisa 2024 nungi iba frontal ya asendenshiba angur. Ibai tongtibang telen ka asünung, Mokokchung region kübok constituency koba nungsa unit tenteta maka, item nungji tenteta aotsü temulung agütsütsüla, ta NDPP Mokokchung Region Tir, Mangyang Jamir-i metetdaktsü. Iba sentong ajanga asen lima temelenshi adoktsüsa shilem agirtemi kanga junga angazüker mapa akümtsü asoshi paisa ajungshia liasü.
Iba sentong nung shisalen sayur Lanuchuba Imchen, Inspector, DAO office Mokokchung-i ‘integrated farming system (IFS)’ onük nung jembidang, iba inyakyim ya shiruru balala, tsünüsembong, aonsotsü, mendi, tsük, ango/an/ninang metsüba, süngdonglidong, süngjanglijang aser tanga yayim (system) kobai kadi ka nem tajangzük agütsür, item temeyoktep aluyimba maparen dang ajar, aser iba ajanga küm piyong aluyimer nem teyari balala agütsür, ta ashi.
Paisa IFS model ya tapu balala lir, anungji, tapi agi masü asen lima kechi tajung akümer tzü mopung dak apet shima ayimtsüla, ta ashi. Paisa IFS nükjidong, ali tzü mopung nüngdakba, IFS dak keta aliba tenük-telen, IFS ayimba nung tajangzük, tatishitsü dena tesayuba agütsü.
Recha Imchen, Asst. Horticulture Officer, Mokokchung-i mushroom cultivation dak sentakba nung – konger metsüba yimya balala, koba mapang aonger, konger achiba ajanga temang nung teyari agütsüba, konger lu ayimba nung ngujem, tanü market nung nüburtemi konger chinüba, tzü mopung sütepba, aser konger lu yima takar akümba takok osang kar lemsatepa liasü.
*****
The Nokinketer 