): Lok Sabha MP, Wb. S. Supongmeren Jamir-i 23rd May, 2025 nü Longmisa yim lushi kübok aliba Martoshi Memorial Mission Project (MMMP) semdanga Lishitzüyong tesem nung sentong ka agi.
Iba sentong nung tetushi tejaoker, Supongmeren-i jembidang, yim ka kübok yimden aser arogo na külemi lungjemer iba ama mapatong tajung achayangba ya jangratemtsüka lir aser iba ama mapa yabo pai mezüngbuba angur, ta metetdaktsü.
Mission mapaji rongsen aka nung dang inyakteter, aji oda, mission senbongi aittsüsa iba ama project tajung tenzüka yangi nungi aruba rongsen züsentetba jagi koda masür timtembapur yariba osang angashia kanga pelar, ta pai ashi. Paisa mission takok ngua aotsü atema meranga inyakba den ochi shia inyaktsü ajungshi.
“Iba ya temoatsü aser nüngdakbapur yaritettsüba mission ka südakjang”, ta pai moatsü. Mission mapaji shirnoki ochishia inyakdir parnok temoatsüba, anungji, atsüayonga masü mulungsoa aser jangrabangra tenzüktsü paisa ayongzüka jembi.
Longsa o Longmisa ji akhi tsürabur mapang nungi tanü tashi lenla balala nung yaritepa aser putepa aruba ama tarutsü nunga yimnasanger tsüngta maneni kasa tangatetba nung putepa alitsü paisa asoshi paisa ayongzük.
MMMP ya Longmisa yimtsüngi mezüng Khristar yimsü bener arusang Martoshi nüngtem tenzükba project ka lir. Iba ya 1986 küm 2nd March nung tenzük, aser ibai tongtibangsa iba awatsüng nungi nungi züsentetba rongsen jagi koda masür kaketshir shirnok züngnür saka rongsen peria maka, parnok nem teyari agütsütsü nükjidong nung tentetba lir, ta MMMP mendenbuba Sashikümzük-i metetdaktsü. Sentong nung Longmisa Village Council Chairman, Merensosang Jamir-i tayongzükba o tulu bener arua telok ayongzük aser Imosanen Pongen-i melepzüng o lemsatep. Dr. Imnatoshi iba sentong nung menden liasü. Longmisa Pastor, Rev. T. Toshi den temoatsü meshia sarasademer tenzük aser Longsa Pastor, Rev. Supongchiten den tenüngsang agüja sarasademer sentong tembang.
*****
The Nokinketer 