(Govt. nungi telangzüba tajung magütsüra tanabuba mera agitsü)
5 Tribes Committee on Review of Reservation Policy (CoRRP)-i district Head Quarters 8 – Mokokchung, Zunheboto, Wokha, Kohima, Chumoukidema, Nuiland, Tseminyu aser Dimapur yimtitem nung ‘public protest rally’ sentong ka democratic yimya nung ayongzüka liogo. Iba lungkak aitba sentong ya “Nagaland job reservation policy” küm 48 tashi metitemi benshia aruba anema Nagaland nung aliba kin pungu – Angami, Ao, Sumi, Lotha aser Rengma kintemi pei pei district H.Q nung ayongzüka liasü.
Kasa lungkak aitba sentong Mokokchung nunga Ao Senden-i ayongzüka town tiyongzü nung liogo. Tanü tsüngsang kanga majung tzünglu tulu aruaka iba sentong nung Ao Senden ketdangsürtemi anir Watsü Mungdang, Ao kaketshir Mungdang, Ao Lanur Telongjem, Tsükong 6 sanger, Mokokchung Town kübok ward-tem aser lenla tabensa nungi nüburtem longsoa arua aden.
Nüburtemi chitti tapak balala nung “Nagaland Job Reservation Policy” anema noktakba o balala zülua bener iba rally nung shilem agia liasü. Police point nung sentong ka agir yang jagi Mokokchung DC office tashi lokti yimdong süa or yaküm 2024 nung kin 5-i sorkar nem takangba agütsüba chitti dak ajemdaker ano tanaben nenshia züluba ka AKM tir ajanga telok dang zünga shir Mokokchung SDO (Civil), Temsuchuba NCS nem amoktsü.
Sentong nung Ao Senden tir, Wb. Marsanen Imsong-i jembidang, kin 5 sanger asoshi telated tajung ka asen chirnurtem asoshi aser Naga nunger songjen lirumdema sakuku jenjang nung alitsü nükjidong nung iba lungkak aitba ya ayongba lir, ta metetdaktsü. “Iba ya kin kar anema masü saka tim masüba ‘job reservation policy’ anema lir, aser Naga lokti nung ochi, lirumedem, sakuku maongka aser temeten asoshi noktaker aser Tsüngremi iba sarasadem langzütsü amanger”, ta ashi.
Paisa “Nagaland job reservation policy” indang otsüren kar lemsatepdang, Nagaland state ngur 1967 nung reservation policy ya yanglu aser ibaji 100% nungi 80% ji Nagaland nung aliba lipuyimpur (indigenous) atema wazüka yutsü, aser 20% ji general category atema liasü. Liyonga arudang 1977 nung 80% nung toagi mezüngbuba kin 7 nem 25% wazüka agütsü, iba ya tongtibangsa nüburtem rongsenketzüng aser tashitemetet nung tangar memenepi atsüngzüka aliba pur nem wazüka agütsüba lir, ta paisa jangjashitsü.
Item kin 7 kübokjia kin tila (sub-tribe) liasü, yamaji liaka kin tulu (major) aser tila (sub-tribe) ta kecha mebendangi 25% nung jagi dang agia aru, saka kodang sub-tribe-temji meilongi Govt-i kin ka asütsü tetemsü ta züngokdang, 25% nungi 12% sükloka 37% kümtsü, aser ano matamabensar-tem atema 4% wazüka yutsü, joko 40% dak tema tuguatokogo, ta paisa ashi.
“Naga nunger ajak ka dang, asenok tsüngta jenjang telemsa mali, anungji, reservation maongka agirtema joko küm 48 tashi tim tagitsü agia aruogo”, ta pai ashi.
Iba rally alitsü osang sangdonger külen, government-i Nagaland Job Reservation Policy dak sentakba nung committee ka shima mapa tenzükogo aser 3rd June, 2025 nü kin 5 sangertem iba onük jembitsü jaoka lir. Paisa iba oten dak sentakba ka jangjashitsüdang, tanü kechiba rally ya akar ta süra, “government-i taoba mapang iba reservation policy reprangshitsü asoshi committee 6-7 ben tashi shimogo saka mapa makümer, joko government dak dak tamang maker, anungji, tanü ya tetenzüker sür yimya balala nung lungkak aittsü kin 5 sanger telemtetba lir”, ta paisa metetdaktsü.
“Tanü asen chirnur kaket shisashiba aser tashi temetet nung akoteta zünger mapa mangur, saka tip külen kin karbo kasa mapa atema marks/percentage tekübokba ngur mapa angudang chirnurtem tezütangteper. Anungji, Nagaland nung maongka saku aser tetemsüyim (meritocracy) benshitsü asoshi tang aliba reservation policy ya tekaraba nung reprangshitsüla, aji mesüra anenatoktsüla ta kin 5 sangeri noktaker”, ta paisa metetdaktsü.
Government-i iba dak sentakba nung telangzüba tajung magütsüra, kin 5-i kechi telemtetba agidir, aser mera balala agiyonga aodang sensosanger ajaki ola ka nung noktaktsü paisa ayongzük. Kin 5-i iba onük dak sentakba nung aiben ajurutepa tatsü talang ajak asadanger 20th Sept, 2024 nü government nem tezüluba ka agütsü saka telangzüba kecha magütsü nung, 26th April, 2025 nüto telangzüba meshia anogo 30 züngzüktsü, saka 26th May, 2025 tashi nung telangzüba kecha mangu. Anungji, tanü kin 5 sangeri pei pei district H.Q nung iba sentong ayonga government dangi Deputy Commissioner ajanga takangba nenshia agütsür, ta Ao Senden tirisa metetdaktsü. Tanü iba sentong nung Watsü Mungdang tir, Wt. Tianaro Jamir, AKM tir, Sb. Lanutoshi Aier aser Ao Lanur Telongjem tayonger, Wb. Imnaonen Pongen par asemia tayongzükba o tulu bener arua jembi.
The Nokinketer 