(Offline audition agiogo, ano online audition agitsü maongka lapoktsütsü)

Tayonger Forerunners Mokokchung züngsemtem den Miss Mokokchung offline audition nung tetendangertem Hotel El-Dora nung tangokba noksa nung angur. Mokokchung, 07 June, 2025  

Mokokchung nüburtem talisa kongrolartem asoshi osang tajung kaji – 2021 küm “Miss Mokokchung” tetoktepba agiba sülen küm asem mekateti arur, taküm iba sentong asendenshia Forerunners Mokokchung teloki Mokokchung District Art & Culture Council (MDACC) aküm nung ayonga akatsü, ta June 7, 2025 nü yangi Hotel El-Dora nung osangbener senden ka alidang tayongertemi metetdaktsüogo. Forerunners teloki tang Miss Mokokchung sentong ayongba ya züngabo tasembenbuba asütsü. 

                Iba dak sentakba nung tanü El-Dora Hotel nung Miss Mokokchung 2025 offline audition ka agiogo aser taruba hoptaji offline audition nung medentetertem asoshi online audition ajanga agitsü maongka lapoktsütsü, aser iba anogoji tayongertemi jilia sangdongtsü aser osang tejangja “forerunnermokokchung” indang instagram nung agütsütsü, ta parnoki shiogo. Tetoktepba nung shilem aginürtemji – Mokokchung nung alir senso asütsüla, tejemba agi tar (height) 5.3 bosa asütsü aser arishi kümji 18-25 tetsüngta pur asütsüla.

                Miss Mokokchung shimba sentongji 25th July, 2025 aonung Mokokchung town hall nung akatsü sentong renema lir. Osang tajung kaji – taküm iba dak sentakba nung tetoktepertem nem yimya awashi aser shisalen sayutsü asoshi Kohima nungi mongin kar arutsü, aser shilem agirtem asoshi anisüngzük tulu kaji – sobaliba sobutsü dak alaka tetoktepba aonungji tetoktepertem asoshi Shillong nungi nüngtugu designer telok kadi design asüba tolatem asemtsü aser sobutsütemji tayongertemi angati renemtsütsü, ta parnokisa metedaktsü.

                Ano jangratemtsü kaji – Miss Mokokchung shimba aonungji tang tebendak Miss Kerala aser Miss Manipur na jaoka lir aser nüngtugu artist kari shilem agitsü saka tang agibo itemji shia matar, ta tayonger züngsem kadi ashi. “Küm talangka lir iba sentong ya ayonger asünung taküm ya balaka akatsü renemshidar aser Miss Nagaland tetoktepba nungjia tajungtiba shimer yoktsü onok terenemshiba lir”, ta parnokisa shisem.

                Taküm iba tetoktepba ya “beyond beauty” omen dak ajemdaker agir aser Miss Mokokchung nung takokertem den külem sür lokti asoshi inyaktsü bilemba kaji talisa matamabensartem (special education) dak rangloker inyaknür, aser tanur shirnok iba jagi kongshia lir, itempur ajungkettsütsü aser parnokji lokti nung züngoka amshitsü asoshi nüburtem rongnung tangatetba agütsütsü merangba mapatem inyaktsü, ta Forerunner züngsem kadi ashi.

Miss Mokokchung nüngja (title) shibai bendir, laji MDACC indang “Ambassador” ka asütsü. Taküm iba sentong balaka asütsü ta asübaji 1992 nungi tenzüka Miss Mokokchung adoker rogo aser Ao tsür rongnung Miss Nagaland adokertemi shilem agitsü, ta parnoki shisem.

Küm asem tashi Miss Mokokchung mayongtetba kuli kar lemsatepdang, Covid-19 ajanga alima mesüngjemi kümdaktsüba dang masü rongsenren nunga langzüngi aluba den tia maka tayongertem maliasü aser tejangjangrartema kanga apara liasü, ta MDACC züngsem kadi metetdaktsü.     

Tanü offline audition nung tetendangertemji – Sashila Nathan, Jentiren Jamir, Sentiwapang aser Imnüksüngla par pezü liasü.  

*****