4 buba Tongpok Semchir Pongen Mungdang (TSPM)-i NBSE kübok HSLC tatidang agiba nung Pongen kidong nungi tangar dang alakteta tematiba jenjang (top 20) nung züngokertem nem tetushi agütsüba “Academic Excellence Award 2025” sentong ka 11th July, 2025 nü parnok TSPM Kimen Aongza Ward, Mokokchung nung meraketa agiogo.
Taküm Pongen kidong rongnung kaketshir par asemi top 20 jenjang nung takok nguteta liasü aser parnok tenüngtemji; (i) Sb. Moasanen Pongener, Top 2 (98.00%), tebu tenüng – Wb. L. Chubatoshi Pongen, yim – Aliba, school – Fernwood School Kohima (ii) Kr. Mereninla Pongen, Top 5 (97.50%), tebu tenüng – Wb. Onensashi Pongen, yim- Mongsenyimti, school – Little Flower Hr. Sec. School Kohima aser (iii) Kr. Chubakala Pongen, Top 16 (95.67%), tebu tenüng – Wb. Odikangzük Pongen, yim – Chuchuyimlang, school – Mount Mary Hr. Sec. School, Chumoukedima.
Takoker par asem nem senpet sen 10,000/- den nüngyu kulikaket kaka senpettsüogo. Par asem rongnung Sb. Moasanen Pongener ang tsüngdong arua sentong nung shilem agia tepela o lemsatep. Kr. Mereninla Pongen aser Kr. Chubakala Pongen nabo medentet saka temeyonger kar arua tetushi senpetji agizüka liasü.
Tanü iba sentong nung tajungshi o jembir Dr. Kilangwabang Pongeneri jembidang, takok yagi ola adoker ta asübaji tanü ama dang ajar. Tanü nenoki takok anguba yong alimai nenok tushir. Anungji, ya tetenzüker sür nükjidong matalok tashi meranga azüngtsü aser tangari “hau” ta shitettsüsa jenjang yanglutsü ayongzük.
Tang nungi tenzüker küm 10 tsüngta nung mesüra majungdang ner asemi jenjang ka mesüra kabosa ajangzüker arutsü imlar. Nenok ajanga Pongen kidong ajungkettsütsü teimla tulu lir, anungji, tang koma lir iba amai taküm meraksai jenjang tajung ajangzüktsü merangang, ta pai ajungshia liasü.
Alima nung ya merangaka ataloktsü asü mataloktsüa’r ashitsü makokba aika lir, saka langka kabo ataloktsübasa, aji kechi? ta sürabang, “temelenshiba yabo arulanglang”, aser “shiba alima melenshiba den tsüngkang medema aor parnokji aotsü”, aser “shirnoki alima melenshiba sülen maor parnokji samatsü”, “Alima melenshiba den tapet shirnoki oteter parnokji tokolok techira asür”, ta paisa tashitemeteteri shinba o kar atishia metetdaktsü.
Jenjang kasa nung dang lidi ta asübaji tangatetba tai lir, joko asenoka alima ainba den lirumedema aintsübaji tensai akanger. Tanübo meranga züngang (“study hard”) ta masü, tensa den apet yakyaka/shisa ka-a bushiang (“study smart”/”study wise”) ta jembir, anungji, tensa den sütepa azüngtsü asoshi paisa ajungshi.
Tanü alima ya kanga kera aor, anungji, mapang ya kanga tongtibang lir. Joko alima nung ya shinga azünga malir. Mapa ka mesüra ka nungbosa amdaka lir. Tanü asen lokti nung senden (meeting) agiba yimya ya mapang telatet ka makai agiteper, anungji, tang nungibo ghonda telatet ka yur aginung junger, ta paisa melenshidaktsünüba ka lemsatep.
Tanü alima rongsenren ya shisatsü nung amendaker aor (knowledge based economy), shir lima nung tokolok techira/shisakar ali par limaji takar akümer, anungji, asenoka kaket azüngba aser shisatsü bushiba wadang nung ya temulung agütsütsübaji kanga tongtibang lir, ta paisa ashi.
Lokti senden balala nung tesüiba aser tanü tensa indang otsü jembitsüjia nüngdak saka tarutsü nung koma asütsü aser kechi inyak nung ajungtsü ta asüba nung mapang teimba intok nung tajungba asütsü, ta paisa lemsatep. Tanü asen lima tebilemtsü aika lir – lenmang majungba, tzü agi anüngakongba, healthcare facility aser ano aika, anungji, itemji koma tajungba akümtsü/renloktsü ta asüba nung agütsütsü paisa ayongzük.
Iba sentong nung TSPM vice president – Imtituab Pongen menden liasü. TSPM president – Guru Bendangwati Pongener-i tayongzükba o tulu bener arua tesentepertem ayongzük. ETA convenor Wb. Rongsensashi Pongeni tetushi agütsüba mapang ketdangsüa agi. Iba sentong Sungkomen Baptist Arogo nung Music Director – Moasunep Pongen den temoatsü meshia sarasademer tenzük aser taoba TSPM president – Wb. Sakuwati Pongeni tenüngsang agüja sarasademer tembang. Iba sentong nung TSPM kübok bendang balala nungi adenshia kanga meraketa agia liasü.
The Nokinketer 