27th Mkg Town A/C NDPP Youth Organization aser Nagaland Minerals & Mines na senteper “free medical camp” katsür

Temulungjang aser teret dak sentakba tashitak balala atema angati temang reprangba sentong ka 17^th nungi 19^th July, 2025 tashi 27^th Mokokchung Town Assembly Constituency NDPP Youth Organization aser Nagaland Minerals & Mines CSR ajanga ayongzüka katsüogo.

                Iba free camp ya 27^th Mokokchung Town A/C pur asoshi lir aser par constituency nung ya ward 5 lir, item ward-tem nung ya tantsür-tambur temang nung timtem agi tonger aika lir, aser tangaleni treatment-i moutetertema aika lir, anungji, tang atema temulungjang aser teret (bone mineral density & ECG) dak sentakba nung iba camp ya akar aser yasür ano tanga tashitak indang camp akatsü tebilemba lir, ta 27 Mokokchung Town A/C NDPP Youth Organization, Vice President, Tinukabai osangbener den jembidang metetdaktsü.

                Iba camp nung Guwahati aser Dimapur nungi teret aser temulungjang indang mozü shiteter (doctor-tem) aser temang reprangba kol tajung den mozü tapu balala teperi bener arua treatment den mozü angati lema agütsü. 27^th Mokokchung Town A/C kübok aliba ward 5 – Kichutip ward, Salangtem ward, Aongza ward, Kumlong aser Mongsenbai ward-tem nung iba angati medical camp ji katsü.

                Osang tajung kaji iba camp nung tashitak tuluba puteta treatment agitsüsa kümra, iba nungjia yariteptsü mulunga lir, ta tayongertemisa metetdaktsü.

‘27^th Mokokchung A/C nüburtemi moa lenir tajung alibayong nüburtem asoshi terenlok maparen jenti inyaka arudar, anungji, ozü lenir RD & SIRD Minister, Metsübo Jamir aser par kibong dang kanga  pelar’, ta 27^th Mokokchung Town NDPP Youth Organization ketdangsürtemisa metetdaktsü.

Iba ‘free medical camp’ tenzükba sentong ya Arok Salang, Kichutip Ward, Mokokchung nung agi. Iba camp nung 27^th Mokokchung Town A/C NDPP tir – C. Tia Longkumer, 27 Mokokchung Town A/C NDPP Youth Organization President – Imliyanger,  27 Mokokchung Town A/C NDPP Youth Organization Gen. Secretary – Temsuwati Pongen, Kichutip Ward Chairman – Imkongyanger parnokia shilem agia tepela o den tayongzükba otem lemsatep. Mokokchung Town Baptist Arogo Pastor, Bendang Jamir-i iba sentong moaja sarasademtsü.

(www.nokinketer.in)