~ Dr. R Zulu Jamir

   Kumlong Baptist Arogo, Mokokchung

Naga nunger rongnung asen Ao kinji soja sor nokinketer sotetdak mongjen lir. Lim tekong – tenem, tarok – lenten, aser alijak ajunga ramoka yimsü asütsüsa teyangluribo yimli tulu asen Aor nem agütsü. Saka kodasür Ao lima ya tashi ang aküm? Alima nung meimchir tapu aika liaka Tsüngremi Israel chirtem dak  sakloka pei agitsü techir ka ama mezüja shimtet, saka Israel nüburtemi Tsüngremi mulungba ama mejaja nung, Egypt nunger tsükchir tesashi ket nung küm noklang pezü tashi alar süa alitsü bendanga agütsü. Tanü asen Aortema Naga kin rongnung  samanir ama, pi kintem asoshi nükrangtong asütsü shimtet. Aorji pi kin asoshi anüng petinu ama kangasa wangshia Teyangluribo moatsüogo. Mapang ka Aorji tamangbaren nungi tenzüker;  Yimden yimli, Sorkar wadang, aser lokti ajunga nung teben masü, teküboklen masü, saka tokolak süa aruogo ni! Teyanglur Tsüngremi Israel chirtem dang  ashi ama,  ” Kibubai na teben masü tokolak kümdaktsütsü; aser na teküboklen masü, temalen dang alitsü; nai dang Kibuba ne Tsüngrem temelaba koba tanü ni ne nem agütsüdar, aji kümdanga benshira.” T. Kunem 28:13.

Temeim Ao senso tajungtem, asenok koma tenzük? Koma merena aru? Aser tanü kechi jenjang nung lir? Ajaki khen süoki ia bilemdangdi! Temeim Ao kin, Tsüngrem O ajanga maneni asenok den jembir! “Nenoki jenti imla saka ajiang, aji tera dang liasü; aser aji nenoki kidangi bener aru, aser aji ni aputokatok. Kechiba? ta Temeranger Kibubai ashir. Kechiaser nenok nisung shia pei ki asoshi mazüngi inyakdang kü kibo teraksa nung lir. Anungji nenok madak anüngi pei azüngtsü sota lir aser alimai pei tejang sota lir.” Hagai 1:9-10. Tanü Tsüngremi asenok nem lemzüktsüba temoatsü magitettsüsa kechi agi sota lir, mesüra akhi temoatsü to kong sentoka ali? Aor ajaki khen arok-aroka bilemdangtsü nüngdaker! Atangji asen Ao kinji lipok dang nungi Naga kin ajunga madak yimsü asütsü Tsüngremi khuret ka ama, maongka ka ama, aser temoatsü ka ama, Tsüngremi asen Aor dak temulung lemtetba ya tulu ka liasü. Ni amanger Tsüngremi asenok shimtetba ya pei tejangraba ataloktsü atema masü, saka tanüngba Naga kin ajunga asoshi ammang nung tesangwa milen ka ama, Tanela rongnir asütsü, shisaliok nung lensar asütsü, shimang asoshi taneptsü angudak tesem, Sobaliba arangshidak, aser rongsenketzüng moludak tesem ka asütsü Teyangluribo shimteta toktsü. Tanü ama alima kanga kara melenshia tejakleni aoba putu ka nung asen lima ya joko alima kinük pezü sü den sentaktepa renloka aoba alima tiyongtsü ka kümer alitsüba sürnung ta nemjemseta bilemer!

Süra kechi ajanga tanü asen Ao lima ya tashi ang aküm? Lenmang nungi tenzüker, health care, education, business aser establishment tongtibang kata amenteta malibaji asen lima ya ka asütsü ta bilemer! Kechi timtem ajanga alima yamai raksatet? Leniri anir, shisashir, Tsüngrem nisungtem, nütsüng nübur tila-tulu ajungai khen taroktibai ia bilemdangtsü rongdak nüngdak. Shiruru tila ka ali telung nung aliba koba dang  ‘Kilep’ ta ajar, iba shiruru  shiji kangasa tako ta jembir. Kechiba? Kilep-i asütsü mapang pa shi miima toktsür asür ta tsürabur otsü nung jembir. Iba medem asen Aor tejakleni renloka moutetba ya pi tsüchirtemi razükratema raksatsüba ka masü, saka asen Aor o Aor na kadi ka arishitepba, tenük merem aser Mokokaji  den teyanglur Tsüngrem sentokba ajanga lir.

Yakob 3:14-16 nung ashir, “Saka nenok temulung nung tako aser Mokokaji aser telemsa lira. Ochi anema tiak tesang aser tiyazü tejembi. Iba shisatsü temaba nungi aluba masü, saka alima, shi aser mojingi agütsüba. Kechiyong kechi nung Mokokaji aser telemsa lir, Idakji rarabangsen aser mapa tamajung ajak lir.”  Putu ishika asen Ao kin asoshi tashimait aser tetsükdaktsü tulutibaji iba Lai o ajanga tutettsüogo. Anungji kechi nung asenok tsüka lir, Tsüngrem tenüng nung tera tena rakteta intokdi. II Putipuyang 7:14 nung yamai ashir, “kü nübur shirnok kü tenüng agi ja-a lir parnok sasa ajemaludi süra, aser sarasademra, aser kü tejak bushira, aser parnok lenmang tamajung nungi meyipra, idangji ni kotak nungi angashitsü, aser parnok temenen atoktsü, aser parnok lima aneptsütsü.” Asen Aori dang ajemalua Tsüngrem tsüngdangi arura ajak takoktsü kümdaktsütsü. Isaia 61:3-4 nung ashiba ama, “Zion nung mangyimertem asoshi anepalutsütsü, parnok nem aut melena narozük agütsütsü, mangyimba melena tepelatsü totzü, zürepa aliba tanela melena tenüngsang sobutsü agütsütsü, oda pa sentsüwangshi atema parnok dang temeshi süngdong Kibubai atemba ta ajatsü asoshi, pai ni yok. Parnoki akhidang raksabatem yanglushitsü, alemli azüngazünga toktsüba, putu aika sentokatokba, aser intoka aliba yimtitem parnoki yanglushitsü.” Asen Aor kangasa ajungketa merenba nükmen ya Tsüngrem dak tenzüka lir. Iba yongji Tsüngremi asenok kanga moatsüogo. Ano tanü iba putu nunga asenoki iba nükmen dangisa meyiper: tanela nung süshia, temeim nung süshia, amalitep nung süshia, aser Tsüngrem den tezüngzüktep ayuba nung süshia, kodang Aor item atep akangshidir, atangji Tsüngremi asenok nem aut melena narozük agütsütsü.

Tatem nung Kol. 3:14 nung yamai ashir, “aser item ajak dak alema temeim kobai kechisarena tetemjen telungjem nung alentepa yutsür iba temeimji sobuang.” Asen kini dang kadi ka nem tatok agütsüteper, temeim nung ka küma lungjemer Tsüngrem aniokra, asen lima nung anü tasen ka adoktsü aser iba sangwaji tulu ka alitsü. Tsüngremi Pa agitsü shimtetba Ao kin maneni moajang.

*****