Mokokchung nüburtem asoshi osang tajung kaji – All Nagaland Taxi Association Mokokchung (ANTAM)-i Mokokchung jila tongtibang tesem tenet (7) nung Closed-Circuit Television (CCTV) 14 tenlaba den itemji amenoktsütsü maparen tenzükogo.
Iba mapa tenzükba sentong August 25 nü parnok ANTAM office nung agidang, Mokokchung Traffic Police OC, Athong Lkr-i anir traffic police-tem, ANTAM ketdangsürtem aser osangbenertem densema liasü.
ANTAM tir, Tongpang Pongen-i iba sentong nung jembidang, Mokokchung town nung tang nüburtemi nüngdakba kechi lir ta asadanger aser traffic police-tem den tongteprateper CCTV ya inok nung nüburtem lenmang kar nungbo tajangzük ngudisü ta apiteta ANTAM sanen luden nung jembiteper iba mapatong inyaktsü lemteta liasü, ta metetdaktsü.
Mokokchung nung gari lendong balala ajuruba ya reprangdangra aiaterm nung teimba ataloker, aser lendong ajuruba den gari tsüker ajenba aser nübur meyong osettsüset raksatsüba aika ataloker saka aiaterm ataloker asünung, aiben security camera junga maliba ajanga tsüngsü menguteter mesüra mapang shitak nung aibelenertemji mebushiteter, anungji, iba CCTV amenokba ajanga traffic police asoshi teyari ka asütsü aser nüburtema iba ajanga tali kümdangshitsü imlar, ta pai ashi.
Mokokchung town tiyong nung CCTV kar inoka lir saka iba itemji mapa junga meinyaker, aser dokan aika nung CCTV inoka lir saka itemji pei juri dokan sasep nung auakortem meittsü atema inokba dang, saka public atemabo CCTV inoka mali. Anungji, traffic police den shisa agiteper tongtibang tesem 7 shima (Itemji – IOC Mariani junction nung ka, popular bakery anasa ka, taoba Eastern Hall aliba anasa ka, Elate hostel anasa ka, city square nung ka, FAC bus stand anasa ka, Aier Bakery anasa ka) nung inoktsü aser item tesem ajak nungji camera anana (total 14 CCTV) amenoktsü tanü nungi maparen tenzüktsü, ta tirisa metetdaktsü.
ANTAM omen “service to the public” nung ajemdaker iba tenure yagi 2022-23 Nagaland nung district balala semyonga temba yimtepa jajaogo, 2024 nunga Mokokchung merükmejuba “Clean Mokokchung” maparen nunga akokba nung shilem agiogo aser taküm 2025 nung Mokokchung nüburtem asoshi iba mapatong ya jungdisü ta bilema inyaker, ta paisa ashi. Iba maparen dak sentakba nung Mokokchung Traffic Police-i amalitepa yaritepba asoshi paisa pelaba lemsatep.
Sentong nung Mokokchung Traffic Police OC, Athang Lkr-i mapang tatsüka agidang, ANTAM-i nübur nüngdakba ajiteta iba ama mapa tajung inyakba asoshi pelaba den ibai ajak asoshi tatishitsü ka lir, ta metetdaktsü. ANTAM-i maparen ajak nung Traffic Police den amalitepa aruba asoshia pelaba den tarutsü nunga kasa tangatetba nung külemi senteper nübur asoshi inyaktsü imla-a atar, ta paisa shisem.
Iba ya tenüng agi sayutsü atema masü saka tebilemba tajung yur inyakba mapatong ka lir aser ANTAM-i akokba tashi oset tajungtiba agütsür, anungji, ibai kanga junga anepalua amshidaktsünür, ta ANTAM Advisor, Imli-i mepishia metetdaktsü. Paisa CCTV osettem meshiteta sarasadem.
The Nokinketer 