Ao Senden-i Mangmetong-Doyang PMGSY lenmang semdang

(Ita 18 nung mapa 9-10% dang inyaka lir)

Lotha Hoho den külemi 9^th September 2025 nü, Ao Senden-i tang teyangludak PMGSY kübok Mangmetong – Doyang lenmang repranga jajaogo. Iba lenmang ya M/s LPSS Infra, Kohima-i 21^st March, 2024 nung agizük aser ibai ita 18 (aji tan ita abenar) nung renemtsü asoshi work order nung shia lir, saka iba mapa noklang shilem nung 9-10% dang inyaka lir. Iba lenmang ya kilometer 36.450 lir aser iba mapatong jenjangji 4654.05 lakh lir.

                Iba lenmang repranga jajaba mapang Ao Senden aser Lotha Hoho ketdangsürtem den Ongpangkong Mungdang (OM), Ongpangkong Kaketshir Mungdang (OKM), Mangmetong council, Longkhum council, Pangti, Okotso yim nungi yimsüsür, osangzülurtem, department nungi Er. R. Tekayanger Walling (PIU II, SRRDA Mokokchung, PWD Road & Bridges) aser LPSS Infra tenüng nung mapa agizüksang Contractor, Ghunavi Aye densema liasü.

                Lenmangtem repranga jajar külen, Pangti yimdak senden ka akadang Ao Senden tir, Marsanen Imsong-i Naga lima ya tenem teimba, yangi train, tayimtsü, rong service-tem bulua mali, asenok asoshi senzüsenbongbaji gari lenmang dang, aji oda, nüngdak ajak gari lenmang ajanga dang inyaktsüsa akümer. Anungji, asen lima gari lenmang junga alitsübaji kanga tongtibang aser tanüa asenok yangi senteptsüsa akümba ya tanga kecha masü saka gari lenmang jungdaktsünüba agi lir, ta metetdaktsü.

“Iba ya nisung kar arishi atema inyaker masü saka asen lima gari lenmang tajung aginür”, ta pai ashi. Iba lenmang dak sentakba nung 8^th Aug. 2025 nü Ao Senden-i PWD (R&B) Minister, Kaito Aye dang tiyongi aita iba mapa tekaratiba nung inyaktsü asoshi tezüluba ka agütsü, ibaji agütsür 8^th Sept nü ita ka jungogo, anungji, iba lenmang nung terenlokba kecha lir mali ta tsüngtong reprangi aruogo, saka terenlok noklang shilem nung 9-10% dang aliba ngua kanga sasa-a bilemer aser kheni temulung masür, ta pai contractor aser department ketdangsürtem dang mepelaba ashi. “Tanü semdangba ya tatem masü, ibai merenem tashi maneni meita reprangtsü”, ta Ao Senden tirisa shisem.  

                Ali aonba (earth cutting) mapa kilometer 10 shi meinyaki lir, ibaji timtem maliba tesemtem nung taküm November ita tashi nung tembangtsü aser tan ita nungi culvert, wall anangba, kilentzü mapatem tenzüka inyaktsü aser road metalling mapaji sangküm March 2026 tashi nungbo renemtsütsü, ta contractor Ghunavi Aye-i nangzüka ashi.

                Iba mapa ya ita 18 nung tembangtsü work order nung shia lir, aji saka, ya mapang atsüra asünung, sangküm March 2026 tashi atsülangjang ta mapang meshia lir, ta contractor-isa ashi. Tang ita nungi mapa ajak tenzüka aotsü aser work order nung aliba ama inyaktsü, ta paisa nangzük. Koba tesem nungsa ali dak sentakba nung timtem lir, item nungji nenok teyari nüngdaker, ta paisa Ao Senden, Lotha Hoho aser ali tangshia aliba yimtsüngtem dang mepishia ashi. Paisa anogo tenet nü tsüngta pai tanü telok dang nangzükba otem tezüluba nung tongtsütsü, ta metetdaktsü.

                Lotha Hoho tenüng nung Jt. Secretary, Chumbemo T. Ngullie-i jembidang, iba mapatong nung sen magi-i nüburtemi bendanga agüja amalitepba ama tanga project aika malitsü. Saka mapa kanga anialema inyaker, anungji, nübur ain madokdang tekaraba nung mapa inyaktsü asoshi tekaden pur ajungshia liasü. Paisa Ao Senden-i iba mapa achayangba asoshi pelaba lemsatep.   

                Tanü iba senden nung shilem agia jembir ajaki contractor dang mapa junga meinyakba asoshi mepelaba o aika ashiba den yaktatiba nung iba lenmang renemdaktsünür, ta mepishia metetdaktsü. Iba lenmang ya yanglura district 5-6 nüburtem lenmang aisü nung tajangzük angutsü.  

*****