“Tenten” omen dak rangloker mezüng Nagaland Chief Minister asür P. Shilu Ao bilemteta lipuyimpur (indigenous) saisabong benjong den repsema tanabuba ar atsütepba (tug-of-war) tetoktepba sentong Nov 7 & 8 anogo ananü Longjang yimdak kanga longsoa mungogo. Iba sentong ya Longjang yimden aküm nung Longjang Riongjanger Cultural Society, Mokokchung-i ayongzük.

                Anogo ananü agiba sentong nung akhi asen tsüraburtemi asaya-a aruba saisabong balala asayaba den tsürabur yimya nung yartsüngsang, kentenmenü, saya balala den tetoktepbatem liasü. Meyuo, Jangtok, Noksen Malo, Keling Asa Sayiba, Sungpang Tsüktep, Surempang, Entipong Metsütep, Ao Tsüktep, Nochu, Ami Tsüngtep aser asaya tapu balala saia liasü.

                Tanü iba sentong nung Longjang lushi den arsema alir yim ter (10) – Longpa, Süngratsü, Khar, Mongchen, Dibuia, Waromung, Asangma, Kilengmen, Mongsenyimti aser Chuchuyimlang nungi yimsüsüri anir lenla tabensa nungi arua shilem agia liasü. Ar atsütepba tetoktepba nung Longjang o Sungratsü na final asayaba, Longjang teloki koka taküm 2nd Tug-of-War Championship 2025 takok marok parnoki benogo. Takoker nem senpet sen den trophy agi senpettsü.

                8th Nov nü sentong lapoktsür MLA & Advisor, Water Resources, Tongpang Ozüküm-i jembidang, tsürabur P. Shilu Ao ya par külem züngpur taküm alirtemi ashiba agi, tasütait, tangar dang nungi khenyongi balaka chirapera aketba nisung aser jembishinüba nunga tsüngru tasong liasü ta ashir, pa ama sempetjep aketba nübu Naga nunger aika soteta mali, ta tangari kuli agütsüba ka pai metetdaktsü.

Nagaland statehood mangudang Interim Body ka tentet aser yangji council member 45 shim (Interim body 1961 – 1963), yangji pa tokolakba liasü. 1963 nung statehood ngur 1964 nung mezüng Nagaland Legislative Assembly election agia pa mezüngbuba Chief Minister shimtet. Par tendak alima tensa tia kanga mesüngjemi liasü, anungji, pai CM mapaji küm 2 sür ita ishika dang aben aser pa iba menden nungi anentsüsa kümatok. Pai mapang tatsüka dang benaka iba mapang telungpur den yimjung kishi lapokba maparen tenzük aser par mapang sarkar yimsüsüba aser terenlok mapa nükmen tenzüka yutsüba tanü asenoki iba süngjang achir, ta Tongpangi ashi. Pa dak sempet tajung ajiteta India sarkaria pa nübu amshiba Nagaland otsü nung tejangja lir, ta paisa shisem.

Pa amala lenir kaji yimeri dang masü, Ao kin aser Naga nunger ajungai akümtsübua tushitsü tim. Iba benjong ya tang dang nungi tajungba aser tuluba ayongtsüsa nükjidong südaktsünür, ta paisa ayongzük. P. Shilu Ao nüngtem Mokokchung nung tang koba park ka yangludaki, iba mapa inyaktsü shibai shisatet parnok nem tenüngsang agütsür. Nagaland nung mezüng CM ji ka dang lir aser aji P. Shilu Ao lir, pa nüngtem park yanglubajia pa dak langa lir saka ano iba dang mapa tuluba inyaktsü tim, anungji, iba asoshi asenok ajak khuret südi, ta pai shisem.

Paisa saisabong tsütsü olen kar ashidang, tawa-tanü saisabong aika adokyonga otar, saka lanurtemi asen tetsü teboui asaya-a aruba saisabongtemji metsünga reta wazüka ayutsübaji kanga tongtibang lir, ta metetdaktsü.

Aor dang masü Naga nunger indigenous asaya aika lir, alima ajunga nung reprangdangra tensa den apet saisabong balala yangerteta aruba otsütem lir. Item ajakji nükjidong balala lir, asaya karbo telungjem aser teputep adokdaktsüba-a lir, asenoka anogo ana tashi koba otsüla oboula nungeri tenzüka yutsüba saisabong asaya-a arur, item ajakji nükjidong tajung nung tentet, item nükjidong atalokdakja asayatsü tim. Iba ya ajanga asen yimti nung kin o kin, mepu tsüngta, yimer rongnung telungjem adoktsü, aji sür temeket yimtsüng 10 den aser Aor ajak lungjema amungtsü nükjidong asütsü paisa ayongzük.

Sentong shibangtsür MLA & Advisor, Law & Justice and Land Revenue, T.N Manen IAS (Rtd)-i jembidang, ar atsütepba ya Olympic nungbo asaya ka ama züngoka masayar, saka ibai alima ajunga nung nüngtugu süa asayaba saisabong ka lir. Iba asaya nung Thailand nunger tetsür aser tebur na pronglai kanga tajung. Iba asaya nung tanü alima nung parnok tematiba jenjang nung lir. Iba benjong aser ar atsütepba tetoktepba ya tarutsü nung tajungba aser tuluba ayongtsü merangtsü, anungji, ajaki amaliteptsü ajungshir, ta metetdaktsü.

“Tanü asen lima telungjem agi anünga lir, anungji, iba ama saisabong ka ajanga telungjem tenzüktsü imlar. Tanü koba meimtepa asenoki iba benjong aser tetoktepba akar, ibaji meraksai asenok telungjemba aotsü merangtsüla”, ta paisa ayongzük.

MLA & DPDB chairman, Nuklutoshi-i mapang tatsüka agidang, kishikina yim jaoka iba ama telungjem sentong tajung ayongba asoshi pelaba ashi. Tanü Aor political lenir aser Arogo lenirtemi anogoshi sabang balala nung Aor lungjemtsü atema jembir, saka asen Aorsa melungjemba, tanü asenok iba tia nung lir, ta metetdaktsü. Tanü koba mapa tajung tenzüker aser samanir P. Shilu Ao tenüng nung asenok ajuruteper, asenok lungjemba ajanga asen Aor ajak lungjemdaktsütsü asoshi mapalem kar inyaktsü nükjidong südi, ta paisa ayongzük.

Tanü alima nung saisabong tapu aika asayar, saka asen nüburtemi indigenous games kangabo sapua masayaba mapang ka, tanü iba sentong ayongertemi akhi asen tsüraburtemi asaya-a aruba saisabongtem asendenshitsü merangba asoshi pelar, ta MLA & Advisor, Fisheries & Aquatic Resources,  A Pangjung Jamiri metetdaktsü. Ashiko, tsüraburtemi asaya aruba saisabong karbo international level nunga züngoka saitsü mapangi bener arutsüa akok, ta paisa shisem.

Sentong nung Ao Senden Tir, Marsanen Imsong, Longjang Village Council Chairman, Ningshi Aier, Longjang Riongjanger Cultural Society Tir, Imnatemsu Aier aser ano tangar karia shilem agia liasü. Iba sentong nung telok balalai sobaliba yimya nung kentenmenü, yartsüngsang, sobaliba saya balala ia sayuba ajanga benjongmungertem kanga longsodaktsü.   

*****