Mokokchung, 19th-Nov-2025 (www.nokinketer.in): Directorate General FS, CD & HG, Ministry of Home Affairs, Govt. of India teyari nung Department of Home Guards, Civil Defence & State Disaster Response Force, Nagaland-i ayongzüka 18th Nov nü civil defence warden aser volunteer-tem atema training sentong ka Mokokchung town hall nung tenzükogo.
Iba kasa sentongji Mangkolemba aser Tuli nunga agitar. Tesem asemprongla nungji yimdak yimtsüng nungi yimsüsürtem, mulungtet telok balala nungi ketdangsürtem parnok 360 shi adenshia lendong balala mapang kechi inyaktsüla ta asüba tesayuba balala angazüka dendaki.
Tanep training tenzükba sentong nung Mokokchung Deputy Commissioner & Civil Defence Controller, Mokokchung, Ajit Kumar Verma, IAS-i jembidang, iba training ya nübur kümzüktsü asoshi lir, lendongji kar nisungi yangluba lir aser aser karbo pa nung alima yimya ajanga adoker, aji oda, item lendong balalaji kodang ataloktsüar ashitsü makok, anungji, asenok renemer lira asenoki nisung taküm aika kümzüktettsü, ta ashi.
Yimya agi lendong atalokba mapang shitak nung tekümzükertemji metongteter, anungji, nüburtem rongnung iba training agir aliba ajanga lendong atalokdang parnok jagi anepaluteter, anungji, zübazüba magii kanga junga angazüker aotsü asoshi pai ayongzük.
Lendong mapang nübur kümzükba maparen tongtibang indang ya nüburtem nem kanga junga angatetdaktsütsü asoshi mulungtet telok balala den arogotemi shilem agitsüla, ta Mokokchung DC-isa mepishia metetdaktsü.
Nagaland nung wardens & volunteers atema training agütsübaji tang ya mezüngbuba asütsü, iba training ya anogo 7 nü agitsü aser idangji warden/volunteer ka khuret den lendong tapu balala atalokdang tongtibang teinyaktsütem aser nübur kümzükba tasa balala sayutsü, ta Company Commander HG, CD & SDRF & CD Deputy Controller, Mokokchung, Lanutemjen-i metetdaktsü.
Iba sentong nung Abovi K Awomi Instructor Havildar HG, CD & SDRF, Mokokchung menden liasü aser Watsü Mungdang tir, Tianaro Jamir-i temoatsü meshia sarasademer sentong tenzük.
The Nokinketer 