Mokokchung Additional Deputy Commissioner & Chief Executive Officer MMC, Atsüngba Walling-i 25th Nov, 2025 nü online/mobile ajanga taxi service agütsüba mapatong “UraCab” ta sür ka tenzüktsüogo.
UraCab ya yaküm Kohima nung tenzük aser kasa service ji tawa Kiphire nunga tenzükogo aser tang Mokokchung nunga tenzüka aotsü asoshi maparen tenzüker. Tatsüka lir Dimapur nunga tenzüktsü aser küm 3 tsüngta nung Nagaland ajunga nung tenzüktsü aser küm 5 sülenbo North-East state balala nung tenzüka aotsü par mangdang lir.
UraCab Pvt. Ltd. nung Founder & CEO-ji Keduolie Mere lir. Pa ya National Institute of Engineering (NIE), Mysore nung azüng nübu ka lir aser pa aser par teloki UraCab ya “Ola” aser “Uber” amala service agütsütsü mangdang yur tenzükba mapatong ka lir.
Mokokchung ADC, Atsüng Walling-i iba mapatong tenzükja jembidang, tensa den apet ibai kanga dang nüngdakba mapatong ka lir, ta ashi. Ibai nübur nüngdakba service ka asünung, customer-tem temulung südaktsütsübaji kanga tongtibang lir, kechiyong business nungbo customer-ji chuba mesüka lir, anungji, nübur den tesentaktep tajung ayutsübaji tenüngdaktsü, ta ashi.
Gari business ka inyaker asünung, kümzükba (safety)-ji tongtibangtiba asütsüla. Driver-temi gari aniba dak sentakba nung temzüng-ozüng den driver ka teinyaktsü metettsüla aser iba company yagi driver-tem nem awashi meteta gari anitsü asoshi lenmangtem sayutsüla, ta pai shisem.
Iba mapatong takok angutsü asoshi aroki shilem agitsü nüngdaker, anungji, nüburtemia iba wadang takok ngudaktsütsü asoshi nungittsüla. Ibai mezüngbuba tenzüker asünung, tsükdakradang tapu balala ajurutsü akok, saka ajakji kokteta aotsü imlar, ta paisa moaja metetdaktsü.
UraCab nung tenüng züluoktsü jangrartem asoshi tanü nungi registration maparen tenzüker. Tejangrartemi parnok website mesüra mobile app ajanga tenüng zülutettsü akok. Iba dak sentakba nung osang tejangja nüngdakertemi Mokokchung Coordinator, Mr. Toshi kichu (7005951350) den tongteprateptsü junger.
Mokokchung ama tobur tajung town ka nung UraCab tenzüktsübaji jangratema bilemer aser ozü company asoshi ibai tapak tasen ka asütsü. Nagaland ya alima balaka, tokong tenem agi sünger, yamaji lenmanga kanga temesü, iyongji traffic tebilemtsü ya ulura, iba den public transport jangra matem, aser ano meshitetba timtem aika lir, item ajakji asadanger “UraCab” ya tenzükba lir, ta UraCab General Manager, Kenrilezo Rutsa-i metetdaktsü.
UraCab nung registered asüba ajanga tajangzük balala aliba indang paisa lemsatep. Onoki Mokokchung town tajungba kümdaktsütsü asoshi service tajungtiba agütsütsü merangtsü, anungji, iba mapatong takok angutsü asoshi district administration-i anir telok balala aser nüburtemi nungita yaridaktsünür, ta paisa mepishia ayongzük. Iba mapatong asoshi temoatsü meshia Mokokchung Town Baptist Arogo Deacon, Sako Longkumer-i sarasademtsü.
*****
The Nokinketer 