Ungma, 5th February (www.nokinketer.in): Guru Rarenbenba Tatar-i tawa Governor’s Award 2025 anguba nüngtem nung tenüngsang agütsüba sarasadem sentong ka 5th Feb, 2026 nü par kidang ayongzüka kaogo. Iba sentong nung Ungma yimden yimsüsürtem den arogo tenzüker, District Culture Office Mokokchung nungi, Mekümpong Longkumer kidong, Longtrok Senden Ungma, pur medemertem aser kidangkimang arua shilem agia dena liasü.
Iba award ya 2025 küm August ita nungto agitsüba renemer liasü, saka Nagaland Governor (La. Ganesan) iba lima nungi pilaba ajanga iba sentong thitem aser iba kasa sentongji taküm 2nd February, 2026 nü ang agia liasü, ta Guru Rarenbenba-i metetdaktsü.
Iba konang ya tongtibangsa Ungma lima tatsü-tambui anir külem yimsüsürtem aküm nung, department nung ketdangsürtem, NEZCC, Longtrok Senden Ungma, Padma Shri & Guru Sangyusang, arogo tenzükertemi anir nütsüng nüburtemi sarasademtsüba den telok balalai aser temeim kinungtsü aser pur medemertemi nungita yariba ajanga ngutetba lir, ta pelaba o ka lemsatep.
‘Lanuwa nungi sobaliba kentenmenü, otsüolem aser yartsüngsang ya ni kanga dang jangra angazük aser tanü ni kechi angazüka lir, itemji tarutsü lanu asensortem dang asen takar sobalibaji sayua anitettsü kü mangdang lir’, ta pai ashi.
‘Tanü alima nung luyim aika lir, anungji, koba luyim nung südir süaka, tom nung tezütanger metoktsüi nükjidong tejangja yur maneni meranga inyaktsü ajungshir’, ta pai lanurtem nem tayongzükba o ka ashi. “Naga nunger” aser “Aor” ta nümatanga shitettsübaji asen ayak ya lir aser iba ayakji asen sobaliba ajanga dang shisangtet. Sobaliba ya kanga tongtibang lir, tanü joko lanurtemi asen ayak mejangjai odaki, anungji, sobaliba tajungtem benshia alima den jangyumedema aotsü asoshi paisa sobaliba wazüka ayutsü olen ka shisem.
‘Na bendangli tesem balala nung liaka, nai ne ayak mejangjara asenokji samatokba kin rongnung densemtsü. Tulu azüngbaji kanga junger, iba den külemi ano nai asen sobaliba metettsü merangtsüla, kechiaser sobalibaji dang asen maitsü (identity) lir’, ta ashi. ‘Lanurtemi pei sobaliba metsünga reta aser azüita tejang tanga bener odaktsünür’, ta paisa ayongzük.
District Culture Officer, Mokokchung, Yimya-ia mapang tatsüka agidang, Guru nüngja mesüra Governor’s Award ya mashi ka nem magütsür, item konang angutsübaji temela masü saka shirnoki kanga meranga inyaker parnok nem dang agütsür. Anungji, Guru Rarenbenba-i tanitebelem mesasai merangba ajanga tanü pai iba konang ya ngutetogo, ta ashi.
Iba ama Guru mesüra Award angutsü atema nai inyaktetba kulitemji kanga junga rizüngtsüla (documentation), aji kanga tongtibang lir, asenok aikadi meranger aser sempet liaka kuli kakettem peria makaba ajanga menguteter, anungji, documentation-ji kanga tongtibang lir, ta pai metetdaktsü.
Guru nüngja angurji Ungma yimdak teimba lir, anungji, iba yimtsüng nungi tenzüka Ao lima songjen nung sobaliba kentenmenü, otsüolem, yartsüngsang aser teka mapa balala inyakba nung ano temulung tali agüja Ao lima ya metapenzür arudak tesem ka kümdakja aser rongsenren nung ajungkettsü nükla yur inyaktsü paisa ayongzük.
Kenshiroshir Guru Rarenbenba ya Ungma yimdak yimsüsür ka lir, pa kinungtsü Imoyangla Jamir (Longkong tsür), Tsüngremi tena nem jabaso ana den jala ka moaja lir. Pa ya sobaliba wazüka ayutsü asoshi merangba nübu ka lir. Lanurtemji tarutsü nükla ta angateta pai kongshirtem anidena sobaliba kentenmenü, otsüolem aser yartsüngsang balala sayur. Pa ya India lima tesem balala shilem agia aruba nübu ka. NEZCC kübok Guru Shishya Parampara Scheme nungi pa ya Guru nüngja angu. Pa nem Governor’s Award agütsüba ya sobaliba kentenmenü aser yartsüngsang luyim tsütsü alakteta shilem agiba reprangteta senpettsüba lir.
Iba sentong nung Imtidongba Tatar (Aola); Longtrok Senden Ungma tatong tir, Imti; Ungma Mekümpong Longkumer kidong tenüng nung Sungküm Tatar parnokia shilem agia jembi. Ungma Baptist Arogo Music Director, Chungpongtoshi iba sentong nung menden liasü. UBC Counselor, R. Apok den temoatsü meshia sarasademer tenzük aser UBC Pastor, Rev. T. Wati Longkumer-i tenüngsang agütsür sentong tembang.
*****
The Nokinketer 