Mokokchung nungi adokba coffee ya alima ajungai sabur aser market nung kanga demand lir, anungji, Mokokchung ya Nagaland nung “coffee capital” ka kümdaktsütsü merangdi, ta Mangmetong nunger coffee lu ayimer aser ITI Mokokchung nung Principal, Er. T. Imlisunep Ao (ajaki pa dang Er. Philip ta ajar) den sensaksemdang pai metetdaktsü.
Asen lima ya coffee lu ayimtsü asoshi ali aser tzü mopung kanga tesütep ta ibala asadanger mongintemi ashir. Tanga state-tem nunga coffee lu tulu ayimertem lir saka itemji joko tejen akümba den mozümora (artificial fertilizer) amshir asünung terunem jena aor saka Mokokchung nungi adokba coffee yabo pa nung terunem (flavor) lia atanger aser taste-ji kanga junger, ta mongintemi ashiba ka, Er. Philip-i lemsatep.
Alima nung coffee taste tetendangba ka sa agir, iba nungji Mokokchung coffee ji 100% nung 80% dak tali score nguteta lir. Tetezü Mokokchung nungi adokba coffee-ji alimai junger ta züngokba rongnung densemer, ta pai ashi. India lima aser bendangli tesem balala nungi mongintem arua parnoki asadangogo aser Mokokchung coffee-ji junger ta ashiba den parnoki tulujunga (bulk nung) aginür, saka tang tangbo asenoki parnok taginübaji metongtsüteter, ta ta pai kuli kar dena ashi.
Tang market nung Mokokchung coffee-ji teküp dena akongba (dried beans) seret nung senpak 180/- agi alir aser teküp intoker akongba (parchment) seret nung 380-450/- agi aliteper. ‘Nibo machine nung terara ronger (roast sür) seret nung senpak 1600/- agisa ayoker’, ta ashi. Tangji par coffee lu koba Mangmetong lushi nung yimdar, yangji ita nung seret 50 shi züsenteter, ta pai ashi. Ano Tuensang, Noklak aser Shamator nung adokba coffee-tema saku tajung ta ashir, anungji, parnok indangjia tangalen nungi arua alia bener aor ta pa nungi angazük.
Tawa pa indang coffee tasting atema Gujarat-i India nung süngojok supplier tulu kadi or tendangdang, parnokia Mokokchung Coffee ji kanga junger ta ashi aser parnoki ita nung ton 5-10 (ton ka ji seret 1000 alir) tashi yoktettsü meyoktettsü? ta asüngdanga liasü. Tetezü parnoki asenok indang coffee jenjangji metetogo, ta pai ashi.
Ali ya asenok asoshi rongsen tulutiba lir aser asen lima ali peria kar. Coffee lu ayimtsü ali aser tzü mopung tapet, iba den asen lima adokba coffee-ji alima market nung demand kanga lir, anungji, asenoki ali ya tamshi ashitsüla, ta pai ashi.
Mokokchung ya coffee tajungtiba adokba tesem ka sütettsü ngujem tulu lir, ta pai ashi. Coffee ji tapu balala lir, anungji, asen ali dak apet ayimtsüla, ta paisa shisem. Mokokchung Ongpanglen “Arabica coffee” aser azünglen “Robusta coffee” ajunger, aser coffee anapronglaji kanga junger, ta pai ashi. Nagaland indang coffee ya alima nung coffee tajungtiba rongnung mezüngbuba khen aser tanabuba jenjang khen ta adoka lir, ta paisa shisem.
Coffee lu koda ayimtsü? ta metetnüa asüngdangdang, coffee lu ayimtsü kecha balaka tasak masü. Süngdong marungtsü saka aih dang merüktettsü. Coffee yagi akhüm nüngdaker, anungji, coffee meyokdang mezüngbuba küm ka-ana süngjanglijang mesüra süngdonglidong kar atemtsü. Aji sür küm ana shi lir coffee-ji atem nung junger, ta pai ajangshiba tasa kar agütsü. Coffee ya küm 4 nungbo aror, junga dang inyakra küm 3 nunga aror. Anungji, küm 5 tsüngta nungbo pei poksüngbo nguteta jangratema alitsü. Tazünger ajakibo sorkar mapa mangutsü, anungji, lanur karibo ali dangi meyiper coffee lu nung temulung agütsütsüla, ta paisa ayongzük.
Nagaland nung coffee indang head office ya Mokokchung nung amendaka lir. Coffee Board lir aser Land Resources Department-ia senotsü den metsü (saplings) angati agütsür aser shisatsü nunga yariteper. Anungji, tejangrartemi parnokji bushia oa item teyari balala agitettsü akok. Iba dak sentakba nung tejangrartemi pa (Er. Philip) ajurua pa nungi shisatsü aginung junger.
Tsük lu mesüra kolar lu mesüra ano tanga lu ayimbajia majung ta mashir, saka item dang nungi coffee jenjang tuluba. Tanü Mokokchung coffee ya alimai kanga dang sabua jemteper aser market nung kanga demand lir, anungji, item ngujemji meteta coffee lu ayimtsü ajungshir aser Nagaland nung Mokokchung ya “coffee capital” ka kümdaktsütsü merangdi, ta pai ayongzük.
Asenoki meranga inyaktsüla aser Tsüngremi asenok nem moatsüba ali aser kechisarena (resources-tem) ji tamshi shia amshitsüla aser yangi nungi nashi mamatzü aser ninang mojitzüji tanen makai adokdaktsütsü merangtsüla, ta paisa ayongzük.
The Nokinketer 