Mokokchung, 1st April, 2026: National People’s Party (NPP) candidate I. Abenjang shiba tang aruya aliba 28-Koridang Assembly Constituency nungi tokteptsü lir, pai 31st March & 1st April, 2026 nü Kinunger, Aliba, Chungtia, Meküli yim aser Mokokchung town kübok Yimyu ward-tem semdanga pa election-i aiba sangdongba den yimden yimsürtem ajurua yimli meshia jajaogo.
Tesem balala sema jajadang nüburtemi Koridang constituency nung ya tapak (chapter) tasen ka tenzüka yimden asendenshinüba nela ka aginür amai reprangteter, ta iba osangbeneri I. Abenjang den jembidang pai reprangtetba ka lemsatep.
“Koridang ya regional mungjen ka ta jembir, saka na national party nungi aiba jagi tetsükdaktsü maluli ma?” ta asüngdangdang, NPP ya national party ka lir saka tanelabo regional lir. Asenok asoshibo terenlok masü saka linük asoshiji mezüngbuba ta angateta lir, aser pa-a iba nungji noktaka lir aser tsüraburi amenteta yutsüba jenjangji maneni wazüka aser kümzüka ayutsü merangtsü, ta pai ashi.
Pai tesem balala sema senzüdang yim/ward sangertemi pa pela-a agizükba den yim süngküm lapoktsüba asoshi pelaba den pai nübur meimba agiba pa election-i air asünung, maongka agütsüra ochi shia nübur tenzüktsü, ta pai metetdaktsü.
Lanurtem, tetsür jenjang aser aluyimba wadang ajungketba den tanga teinyaktsü nükjidong jenti bener noktaker, anungji, nüburtemi pa temsüa ajitetra pa nem maongka agüjang, ta paisa mepishia metetdaktsü.
NPP vice president, Vevoy Wideo-i jembidang, NPP ya tanela regional saka national sentsü aketba political party ka lir, ibai north-east nüburtem ola ka sür koda masür aser maongka junga manguba nüburtem asoshi lungjemer noktaktsü tentetba party ka lir, ta pai metetdaktsü.
I. Abenjang dak nübur meimba shisatsü aser tangatetba tajung ngua aser pai Koridang sanger junga anitsü ta tamang tulu yur pa nem NPP ticket agütsüogo. NPP ya central, Nagaland aser tanga state-tem nunga alliance sür sarkar yanglur odar, saka alliance aliyongbo election nung metokteptsü ta mali, ta paisa nüburtem memangmangtsü asoshi olen ka jangjashitsü.
“BJP” aser “Congress” party nung central lenirtemji tzümar dang lir aser lenmang aisü nung asenok meputeper, saka NPP central lenirtemji asenok nisung amai dang lir. Ano “Independent” yabo tsürabur maliba lajar mesük, anungji, NPP ya dang asenok asoshi tapet party ka lir, anungji, iba party nem vote agütsütsü asoshi NPP vice president-isa mepishia metetdaktsü.
Yim balala councils aser Yimyu ward yimden yimsusurtemi shilem agidang ajaki olen mesüktepa jembiba kaji, candidate kecha mebendangi ajak asoshi süngküm satema lapoktsür aser polling tesünep aser yimjung nung agitsü tangatetba lir, anungji, election inyakyim (MCC) nung aibelen mesüi ajaki yimya tajungtiba nung nübu ayimtsü asoshi mepishia metetdaktsü. Shir teloki tim masüba inyakdir, temzüngi melaba ama merenshitsü, ta parnokisa metetdaktsü.
*****
The Nokinketer 