(Kaketshir 24-i course balala nung takok kuli agizük)
http://www.nokinketer.in: Note Grid School of Music, Mokokchung pur Christmas jili den repsema tanabuba takoker nem tenüngsang agütsüba sentong ka Dec 13th, 2024 nü yangi Ao Temulung Kilem, Mokokchung town nung meraketa ayongzüka liogo. Taküm iba school nungi course balala agir grade balala nung parnok 24-i takok anguba kulikakettem agizükogo.
Sentong nung tetushi tejaoker, Mokokchung Municipal Council Councilor, Wapang Kichu-i mapang tatsüka agia jembidang, asenok ajak ya takoker kaka mekümtet, saka takokertemia ‘kokerji ta sür masükümi tali ajemalutsüla’, ta ashi.
Kentenmenü ya sempet aser iba yabo tasodang nungi aketba ka lir. Tangar kadi guitar junga temteter ta sür naia temtetba mapa ka masü. Nisung shia sempet balala moaja lir, nai ken junga metentetaka kongki junga temtettsü akok, yamaji nai kongki junga metemtetaka ken junga tentettsü akok. Ibai sempet lir, anungji, asenoki kechisarena nung Tsüngrem mezüng südaktsüra tanüngbaji jungatoktsü, ta paisa ayongzüka liasü.
Iba sentong nung Note Grid Children Choir-i ken ana aten, Sanomaya-i violin solo ka, Rongpangnok-i drum solo ka, Akumseni ken solo ka, Nokinwala-i piano piece ka, Jongshiwapang shiba ANCSU Meet 2024 nung best guitarist agizük, paia guitar solo ka ta yangji iba school nung azünger lenla balala nungi shilem agiba ajanga tesentepertem tzüratemdaktsü.
Sentong nung Note Grid School of Music Mokokchung Administrator, Senti Imchen menden liasü. Tsüraburtem tenüng nung Amenla aser tesayurtem tenüng nung violin sayur, Jongpongtoshi nadi tepela o den tayongzükba tulu bener arua ayongzük. Note Grid School of Music aser yangji azüngertem atema Mokokchung Town Baptist Arogo Assoc. Pastor, Monglier-i temoatsü meshia sarasademtsü.
*****
The Nokinketer 