December 2024 atema Mokokchung District Planning & Development Board (DPDB) senden den repsema Christmas jili sentong ka Dec 11 nü Mokokchung Deputy Commissioner Conference hall nung kaogo.
Iba sentong nung Christmas osang abener NEALEAST tir, Rev. Dr. Takatemjen-i jembidang, tanü alima ajunga nung yimjung atema sashia jembiteper saka yimjungbo mali, tesasatsüka tanü arogo tashi nung yimjung mali kümogo, pei tebilemba meshiteti tsübuseta aliba lima ka nung asenok alir, ta ashi.
Iba ama tensa tia ka nung Yisu ji dang yimjung tzüpokdak lir ta agizüka taküm iba Christmas amungtsü tayongzükba agütsü. Paisa tasen Lai Yohan 17 nung ajemdaker Yisu-i yimjung atema sarasademba ama taküm Christmas mapang asen lima, sarkar aser kija kibongtem asoshi sarasademtsü pai tayongzükba agütsü.
DPDB mendenbuba & NLA Speaker, Sharingain Longkumer-ia Christmas salem lemsatepdang, Yohan tapu ka nung ajemdaker asen taküm medemdanga Tsüngremer taochi bilemteta asen taküm nung tesangwa lidaktsüba den pei mulungjang nung yimjung chuba sodaktsütsü asoshi tayongzükba agütsü.
DPDB senden agiba mapang, tourism onük ya ulura, anungji, iba dak sentakba nung department ajaki temulung agütsü nung dang iba mapa ya takok ngutettsü ta Mokokchung DPDB mendenbubai ashi. Tangar jilu ajizüka masü saka Mokokchung nungia pei maitsü nung ajemdaker asen dak apet/bangnang balaka adoktsüla, asenok kechi ibaji sayutettsüsa mapatong atongtsüla, ta pai tourism tsütsü olen kar lemsatep.
Paisa Dr. Imkongliba Memorial District Hospital (IMDH) Mokokchung ajanga koba mozüki paitoka Chang Church ajanga black topping (lenmang) aotsü asoshi tebilemba benokogo, ibaji tekaratiba nung inyaktsü, ta metetdaktsü.
Ao Senden ajanga V.K town nungi Doyang ayong tashi lenmang majungba den IMDH tuluba küma yangluba maparen dak sentakba nung koba ola adokogo, ibajia tekaratiba nung tim teinyaktsü inyaktsü, ta pai metetdaktsü. Paisa Ao Senden-i tebilemtsü balala ajiteta ola adokba asoshi pelaba lemsatep.
Paisa temepishiba ka lemsatepdang, asenok ajak ya nübur tenzükertem lir ta metetdi, anungji, benjong mapang nübur timtem majurudaktsüi pei tata mapa inyaktsü renema alitsüla, ta ashi. Anungji, district administration-i anir line department ajaki lendong mataloktsüsa pei mapa nung nendaka inyaktsü renema atatsü paisa ayongzük. Benjong mungaka nübur atema teinyaktsü kechi lir, ibajibo maneni nendaka inyakdaktsünür, ta paisa mepishia shisem.
Paisa taruba küm January ita DPDB atema tejembitsü onük lemsatepdang, Mokokchung district nung lenmang koma inyak nung ajungtsü mesüra mei mapang nüburtem timtem majurutsüsa kechi asalentong atong nung ajungtsü ta asüba nung ajemdaker National Highway aser Road & Bridges (PWD) ajanga tebilemba bener arutsü metetdaktsü. Mokokchung DC & DPDB Vice Chairman, Thsuvisie Phoji-ia mapang tatsüka agidang, Mokokchung district ya eco-tourism tsütsü ngujem kanga aliba ajiteter, anungji, DPDB Chairman-i anir lenirtemi iba luyim tsütsü temulung agüja maparen kar tenzüktet nungbo kanga ajungtsü ta tebilemba ka lemsatep.
The Nokinketer 