Mokokchung, 10th November 2026 (Nokinketer News): Naga People’s Front Youth Wing Mokokchung Division-i “Vision Mokokchung” ta sür shisatokten sentong ka parnok office nung ayongzüka kaogo. Iba sentong nung NPF Central office pur den Mokokchung Division kübok lenla balala nungi ketdangsürtem adenshia shilem agia denogo.
Sentong nung shisalen sayurtemji – Mokokchung Municipal Council (MMC) Dy. Chairperson Lanuakum, Mokokchung ITI Principal Er. T. Imlisunep Ao, Dr. Imlirenla Walling aser NPF Vice President COB Lanukaba parnok liasü. Shisalen sayurtemi onük balala nung ajemdaker tagitsü onük tajung aika bener arua lemsatep.
Lanuakum-i “reimagining Mokokchung” onük nung jembidang, tanü Mokokchung kechi jenjang nung lir, iba nung ya asenoki koda yangerloka bener aor, iba dakji tulu keta lir, ta pai ashi. Mokokchung nung ya Aor dang masü saka kin balala arua külemi jangratema alitsüsa asenoki koba tashi inyakteter ta asübaji kanga tongtibang lir, kechiyong alima renloktsü asoshi nütsüng yongsük nüngdaker, ta paisa shisem.
“Terenlokbo aginür saka asenoki ali magütsünür, süngdongbo kümshi aika atemer saka kwi intetdaktsür? Aluyimtsü atemabo sashia jembir saka chiyungtsü ajak tangalen nungi dang bener arur, asenok-a joko tensa den apet angazükshir aotsü merangtsüla”, ta paisa ayongzük.
Er. T. Imlisunep Ao-i “Rebuilding Mokokchung: Infrastructure & Economic Opportunities” onük nung jembidang, yimti ka aintsü atema tzü ya kanga tongtibang nüngdakba ka lir, saka Mokokchung nung tzü agi kanga anünger, iba ya tzü maliba agi masü saka asenoki achayang junga mesütetba ajanga lir, ta ashi.
Terenlok indang jembidang lenmang ya kanga tongtibang rongnung ka aser lenmang junga aliba nungji tapu aika sentaka lir, anungji, Mokokchung nung lenmang sentaka alibatem ya kanga junga yanglutsü tim. Iba den ano Mokokchung nung mozüki (IMDH) ya tepetzük tia nung lir. IMDH ya Mokokchung district nüburtem asoshi dang masü, yagi kidanger district-tema tajangzük agütsür, anungji, iba mozüki nung nüngdakba kol-tem amenoktsüla, ta paisa ashi.
Iba den külemi Mokokchung nung tang electricity tashi (power) agibaji 25 MW shi lir, ibaji tangar dang sen crore aika agi alia agir. Tang koba Dikhu Hydro Electric Project ka yangludar, iba ya 186 MW adoktettsüba project lir, saka ali dak sentakba keno kar aliba ajanga mapa mekümteti lir, ibaji kodang mapa kümdir, yagi tajangzük tulu agütsütsü, ta paisa shisem.
Mokokchung nung adokba coffee ya alimai kanga sabur aser demand kanga lir, aser yangi Agarwood (Süngya) lu ayimba nunga sen aahtsü lenmang satema lir, iba den ano Mokokchung ya metapenzür/ralliwalir puatsüsa inyaktettsü ngujem jenti lir, anungji, asen ket nung kechi lir ibaji amshia maongka lapoka aotsü asoshi paisa ayongzük.
Tanü Nagaland nung lanur mapa manguba tebilemtsü ya ulura, sarkar tenzüker itasen agütsüba nung state senbong shilem tuluba ka aor. Anungji, Iba ama tensa tia ka nung skill development agi dang asenok kümzüktettsü. Anungji, skill development tsütsü temulung agütsütsüla aser iba atema Mokokchung nung training balala agütsütsü asoshi centre tulu ka nüngdaker, kechiyong tang Mokokchung nung aliba ITI nung course peria mali, ta paisa ashi.
Dr. Imlirenla-i “Reconnecting Mokokchung: Society, Culture and Community” onük dak ajemdaker jembidang, tanü technology renlokba yagi tsüngtong ajurutepa kibok semtepba ya kanga ajema kümogo. Meimchir tebilemtsü ajakbo Artificial Intelligence yagi telangzüba magütsütettsü, anungji, kibok kisema tantsür-tamburtem nungi shisatsü agitsü asoshi ayongzük.
Tanü reptangdangra, menur kibong aküm yagi tanur masoba tebilemtsü ajurur, tasüba teimba aser tasor kanga agi ishiba. Ya tebilemtsü tulu ka lir. Anungji, mapang shitak nung kibong akümtsü ajungshiteptsü laisa ashi.
Sobaliba ya tensa mapang den apet melenshia aor, anungji, sobaliba tajung kechisa lir itemjibo maneni benshiyonga aotsü saka tajangzük makaba sobalibaji intoktsüla, ta lai ashi.
Yim ka mesüra kiyong ka nung nisung kwi alir ta asübaji tongtibangba masü saka nüburtemji putepa, akümtsübutepa aser lungjema alir malir ta asübaji tongtibangba lir. Maparen aika nung nüburtemi shilem magira, takok mangutsü ta asenoki meteta lir, anungji, nüburtemi shilem agitsü lai ajungshi. Laisa merükmejuba tsütsü, public toilet junga aser peria ayutsü, parking lot akatsü, tantsür-tambur anepaluba (old age service), mapang shitak amshitsü aser lokti balala nung tetsür anioka maongka agütsütsü asoshi ayongzük.
Lanukaba-i “Rethinking Mokokchung: Politics, leadership & Governance” onük nung jembidang, Naga lima yimdenyimli tenzüka aruba otsüren kar ashiba den NPF ya Nagaland nung aliba Naga nunger atema dang masü, saka Naga nunger tesem balala nung alir densema lungjemer alitsü tangatetba yur tentetba lir, ta pai metetdaktsü.
Paisa politics ya kija anemtepba yimya nung masü saka party sentong (party policies) dak rangloker asayatsü pai ashi. Party nung inyakertemi party temzüng kanga junga angateter tenzükba den ruling party ka khuret meteta inyaktsü aser tim nungbo ola adoktsü asoshi pai ayongzük. Paisa “Framework Agreement 2015” aser “Agreed Position 2017” dak sentakba nung lanurtemi meteta aser shisadangtsü atema onük kar süoka jembi.
Iba sentong nung Youth Wing Mokokchung Division President Takonungsang Pongen-i tarurtem pela-a agizükba den iba shisatokten ayongba nükjidong lemsatep.
*****
