Tzükong asem – Jangpetkong, Japukong aser Tzürangkong-i tentetba District Demand Committee, Mangkolemba (DDCM)-i tanü 7th November, 2025 nü Mangkolemba town hall nung public rally ka ayongzüka aka. Ibai tongtibangsa Mangkolemba tang koba Mokokchung district kübok Sub-Division ka lir, ibaji “District” jenjang ajungketjang ta akangba lokti sentong ka liasü.
Tanü iba lokti sentong nung Jangpetkong, Japukong aser Tzürangkong kübok yimtsüng ajak nungi nütsüng nübu kaketshir densema lenla tabensa nungi adenshia chittipak balala nung temeten/yimyim o balala zülua bener shilem agia liasü. Sentong temer külen, lokti külemi yimdong süa or Nagaland Chief Minister, Dr. Neiphiu Rio dangi Mangkolemba ya “District” jenjang ajungketjang ta taoba mapang 24th October, 2017 & 15th October, 2020 nung züluba chitti tanaben nenshiba ka Mangkolemba Addl. Deputy Commissioner, Moakümzük Tzüdir nem DDCM Convenor, C. Onen Wallingi amoktsüogo. Iba chitti nungji tzükong asem sangeri Mangkolemba ya District jenjang kechiba meshir ta asüba onük balala zülua lir.
Tanü iba sentong nung DDCM Convenor, C. Onen Walling-i jembidang, iba luden ya 2013 küm tenzük, aser 24th October, 2017 anogo, Nagaland Chief Minister, T.R. Zeliang ajurua Mangkolemba Sub-Division ya District jenjang ajungketjang ta takangba chitti ka agütsüba nungi state Sarkar den iba dak sentakba nung tongtepratepa maparen tenzükba tatalokba otsü tatongi metetdaktsü.
Mangkolemba District jenjang meshiba dak sentakba oten nung 15th October, 2020 anogo, tanaben chitti ka Nagaland Chief Minister, Dr. Neiphiu Rio nem DDCM Convenor aser Tzükong asem Tir-i sign sür agütsü. Kasa iba dak sentakba maparen nung 03-09-2021 anogo Ao Senden dang Non-Objection-Certificate meshia Tzükong asem Tir aser DDCM, Convenor-i tezüluba nung agütsüba ama, Ao Senden-i 24-01-2022 anogo NOC temelabaji zülu nung agütsü, ta paisa ashi.
Iba dak sentakba nung asen tzükong asem sanger yimtsüng ajak nung yimsüsüri anir sensosanger ajaki aser bendang lima nung alir sensosangertem ajaki yangi asenok ajak shilem lir ta angateta, wadang takok angutsü nükla nung nüngdak ajak nung nungita yaritsü ayongzüker, ta DDCM convenor-isa metetdaktsü.
Nagaland nung tzükong asem Head Quarter Mangkolemba Sub-Division ya tejentiba aser tulutiba lir, anungji, “iba sub-division nungi District jenjangi ajungketjang ta Nagaland Sarkar dang akangba ya tim tangutsü talang ka meshir, aser iba takangba ya state Sarkar anema masü aser Naga kin mesüra lokti tentet shinga anema masü”, DDCM co-convenor, N. Nungsang Lkr-i sentong nung nübur ola aser yimyim shilem agidang metetdaktsü. Anungji, “ochi shisatsü aser tangatetba tajung aliba senso tajungtemi kecha arendaka mebilemi yaritsü Ao kin aser Naga kin ajak dang mepishia ayimoktsür”, ta paisa mepishia metetdaktsü.
“State sarkar tokolakba Nagaland CM, Dr. Nephiu Rio-i anir par Minister-tem aser MLA-tem, Chief Secretary-i anir Sarkar ketdangsür ajak dang sub-division Mangkolemba ya “District” jenjangi ajungketjang ta temepishiba ola tzükong asem tenüng nung nübur ola Nagaland sarkar dang yimyim ayimoktsür”, ta pai metetdaktsü.
“Tzükong asem sanger kümkümshia putu yimsüsür kübok tashi anga-a aser Tsüngrem akümtsübua Pai agütsüba taküm, mapang, rongsen, sempet, shisatsü aser nübu agi tenlatepa iba tongpang takok mangu tashi tali tashi taitba nung noktakdi”, ta paisa DDCM tenüng nung tzükong asem sanger ajak dang ayimoktsü.
Iba sentong nung M. Moa Hoki (Tzürangkong)-i tayongzükba o tulu bener arua tesenteper ayongzük. “Kechiba Mangkolemba ‘Sub-Division’ nungi ‘District’ jenjangi ajungkettsü nüngdaker?” ta asüba onük nung Tongpangtemsü (Jangpetkong), Imdongtangba (Japukong) aser Mangkolemba Watsü Telen Tir, Akala Walling par asemi telangzüba kuli balala bener arua lemsatep. “Lanur Ola” ta sür Takotemsü (Mangkolemba Ao Lanur Telongjem nungi), Rosang Pongen (Jangpetkong nungi) aser Angemangyang (Japukong nungi) parnokia olen tajung aika bener arua ayongzük. All Ward Chairman Mangkolemba, T. Longri Longkumer-i melepzüng o lemsatep. Iba sentong nung Sungtiaküm menden liasü. Mangkolemba Town Baptist Arogo Assoc. Pastor, Toshi Tzüdir den temoatsü meshia sarasademer sentong tenzük aser Ex. Pastor, Rev. Mar den tenüngsang agüja sarasademer sentong tembang.
Mokokchung District Administration kübok Circle Office Mangkolemba Sub-Division ya 1961 küm Jangpetkong (mezüngbo Changkikong liasü) aser Japukong range na ayimjema yimsü asütsü asoshi tentet. Iba sülen iba 1967, 1980, 1991 küm EAC, SDO (Civil) aser ADC Hq. ta jenjang tajungba küma ajungket. Ano, Mangkolemba Sub-Division indang administrative jurisdiction kübok Tzürangkong range züngsemtsüba ajanga Sub-Division ulushia aküm.
Tang ano tensa den apet kechisarena nung alima den sakuku jangyu medema aotsü aser tarutsü nübur jenjang tajungba asoshi tzükong asem senteper tentetba DDCM-i Mangkolemba Sub-Division ya District jenjangi ajungketjang ta state sarkar dang akanger. Iba dak sentakba nung DDCM-i tanüa Nagaland CM, Dr. Neiphiu Rio dangi maneni nenshiba chitti züluogo aser iba nungji parnoki kechiba District jenjang meshir ta asüba kuli tejangja shia lir.
The Nokinketer 