Mokokchung, 6th April (nokinketer.in): 28-Koridang A/C by-election koba 9th April, 2026 nü lir, iba nung tokteptsü alisang Indian National Congress candidate T. Chalukumba Ao atema Longkhüm aser Alichen nung sentong balala ayonga nübu yimja jajaogo.
Nübuyim sentong balala nung Nagaland Lok Sabha MP & NPCC Tir, S. Supongmeren Jamir den Odisha nungi Congress MP & Nagaland In-charge, Saptagiri Sankar Ulaka; Manipur CLP Leader, Meghachandra Singh; Odisha nungi taoba Minister aser Congress lenir, Jaydev Jena; taoba MP/MLA & NPCC Working President, C. Apok Jamir; Mokokchung DCC Working President, I. Temsu Jamir aser ano Congress lenir aika densema shilem agia liasü.
Item tesem balala sema jajadang, constituency terenlok asoshi koba LADP arur, itemji timi ketdangsüa Koridang lirumedema renloktsü asoshi amshitsü, ta INC candidate Chalukumba-i metetdaktsü. Nüburi dang maongka agütsüra, Koridang sanger asoshi maparen ajak meranga jembia inyaktsü, ta nangzüka pa nem yimli agütsütsü mepishia metetdaktsü.
Election petsaperong kecha mekai timi aser tesünep (free and fair) agiba nung amanger, anungji, yimtsüng ajak nung tashiyim mapa kecha medeni nüburtemi pei vote pei-i mulungba candidate nem ajentettsüsa yimdeni lenmang satemsatema lapoktsütsüla, ta paisa mepishia metetdaktsü.
Democracy benshiba yimsüsüba ka nung opposition indang shilemji kanga tongtibang lir, saka opposition melira sarkari tim mesüi inyakba mapa anema ola madoktettsü aser pei sünütsü asütsü, Nagaland nunga sarkarji opposition mali odar, anungji, opposition ola südaktsütsü asoshi Koridang nüburtemi INC candidate Chalukumba nem maongka agütsüdaktsünür, ta Odisha MP & Nagaland Incharge, Saptagiri Sankar Ulaka-i jembidang metetdaktsü.
Nagaland ya Christian state ka ta angazük aser saka yangi tonga arudang, BJP flag aika songa ngur kanga süngmanga bilemogo, kechiyong BJP yagi nütsüng ishika dang aliba nüburtem akoksatsüsa mapa balala inyaker, ta pai ashi.
Chalukumba ya tang agi election-i pezüben aiba tetezü pa dak nübur tenzüknüba tanela ajiteter, ta Lok Sabha MP S. Supongmereni ashi. Congress candidate dak alaka tanüngba candidate ajak adokra ruling sarkar nung adentsü tangatetba lir, anungji, parnokji adokra küm ka sür tesadang kaji tangari kechi shidir hai ta anitaktsü nübutem dang lir, saka kodang Congress candidate adokdir paji assembly nung nüburtem ola sütettsü, anungji, Congress nem yimli agütsütsü asoshi paisa mepishia metetdaktsü.
Nagaland koleni yoknür ta asübaji Koridang-i telemtetba tulu ka agütsütsü aser Naga nunger nem tetuyuba ka sayutsü ta bilemer, aji oda, Naga nunger rongnung Ao kin ya mezüngpur ta tangari züngshir, anungji, kanga shisadanger INC candidate nem vote agütsütsü asoshi mepishir, ta taoba MP & MLA C. Apok Jamir-i ayongzük. Naga yimden tebilemtsü atemer kümsük ana tashi party-less sarkar yanglur arudar, saka Naga yimden terenlokba kecha mangur, ta paisa shisem.
Democracy yimsü nung opposition malibaji nüburtem atema takoksa tulu, opposition ji tongtibang kechiyong iba ajanga sarkar inyakyim aser maparen miteter (check & balance), anungji, Koridang nüburtem ya temelenshi bener arur ka akümtsü asoshi INC candidate shimtsü mepishir, ta Manipur CLP Leader, Meghachandra Singh-i ayongzük.
*****
The Nokinketer 