Mokokchung, 4th April, 2026 (www.nokinketer.in): Tang aruya aliba 28-Koridang Assembly Constituency by-election koba 9th April, 2026 nü agitsüba lir, iba nung National People’s Party (NPP) candidate I. Abenjang-i 3rd April nü Mangmetong yimdak aser 4th April nü Alichen nung pa election-i aiba sangdongba sentong takok ngua agiogo.

Abenjang-i sentong balala jembidang, Koridang asoshi mangdang jenti bener election nung noktaker aser nüburi maongka agütsüra, constituency renloktsü asoshi ochi shia aser taküm bendanga agüja temeim nung lirumedema inyaktsü tejangraba lir, anungji, nüburi mulungra yimli agütsüdaktsünür, ta mepishia liasü.

NPP nükjidongji reprangdangra ibai asenok Naga asoshi tapet political party ka lir. Iba party nung ya asen sobaliba aser tamangba yimsü tsütsü timtem adoktsüsa tashishitsü kecha mali. NPP ya lanurtem, tetsürtem, aluyimer, koda masür aser ajemrepba nüburtem jenjang ajungkettsü/mesotsü aser terenlok mapa balala asoshi temulung agüja inyakba party ka lir, ta pai lemsatep.

Paisa clean election puküma jembidang, azü tokshiba, tashiyim aser election mapang tim masüba mapa balala aitsü. Petsaperong kecha mekai tesünep aser yimjung (free & fair) nung election tembangtsü asoshi tangatetba tajung alitsü asoshi paisa nüburtem ayongzük.

NPP national vice president, Vevoy Wideo-i jembidang, par candidate I. Abenjang dak sempet aser Koridang nübur anitsü nükla tajung angu nung, pa nem party ticket agütsüogo, ta metetdaktsü. NPP ya centre aser state aika nung alliance yanglur aoba party ka lir, aser Nagaland nunga PDA den alliance lir, süra kechiba alliance partner den tokteper ta kari bilema lira ta kuli ashidang, NPP ya political party ka lir aser party kaji election nung tokteptsü atema tenteter aser NPP atema alliance masü saka nüburji tongtibangba lir, anungji, political party ka election-i aibaji kecha tebangkatsü mali, ta jangjashitsü.

BJP-i Vande Mataram ozüng küma/kangshia atentsü/atemtsü inyakba ama NPP-ibo kodanga meinyaker, aser Independent yabo tsürabur maliba lajar mesüka lir, ta pai ashi. NPP ya tanelabo regional saka national status aliba party ka lir, national party ka asü nung dang mainland India nung tangari hau ta züngshir, iyongji national status bener northeast nübur timtemba/kangshiba indang satoksatoka shiteter, ta NPP VP-isa metetdaktsü.

NPP party nung adoker legislator-temi yimsü (rule) masür saka onoki nübur tenzüker (serve asür), aser NPP ya nübur mezüng südaktsüba party ka lir, anungji, Koridang sanger den iba party-i tesentaktep tajung aser teti asoshi yanglunür, anungji, NPP nem maongka khen agütsüdangang, ta paisa mepishia metetdaktsü.

*****www.nokinketer.in*****