TANÜ 28-KORIDANG BY-ELECTION AGIR

Candidate trok rongnung shiba adoktsü amai?

Mokokchung, 8^th April, 2026: 9^th April, 2026 nü 28-Koridang Assembly Constituency by-election agitsü aser vote-ji 5^th May, 2026 nü azüngtsü. Service nung alir aser polling anogo station nung malitsüpur atema 4^th April, 2026 nüto postal ballot agiogo. 

11^th November, 2025 nü Advisor & MLA, Imkong L Imchen asüba ajanga menden tazüng adoka iba by-election agitsüsa kümatok.  Nagaland nung election agiba rongnung candidate aika adoka toktepbaji tan Koridang by-election ya-a ka asütsü ta nüburtemi jembir.   

Candidate par trok (6) rongnung tambusangji – Indian National Congress (INC) candidate T. Chalukumba Ao (Chungtia) asütsü, iba sülen Independent candidate Imchatoba Imchen (Mangmetong), National People’s Party (NPP) candidate I. Abenjang (Longkhüm), Independent candidate Maj. Retd. Toshikaba (Chungtia), Independent candidate Imtiwapang (Chungtia) aser parnok rongnung tanubusang asür Imkong L. Imchen’er jabaso BJP & PDA consensus candidate Daochier I. Imchen lir.

Koridang constituency otsü reprangdangra, national party nungi adokbabo 1987 & 1989 nung Nokzenketba (Indian National Congress) aser 2023 nung asür Imkong L. Imchen BJP nungi adok. Iba dak alaka tanüngba MLA-temjibo Independent aser regional party nungi dang adokba angur.

Taoba 2023 state election nung Imkong L. Imchen (BJP) o Major Toshikaba (NPF) na sashi-sashia toktep aser vote 410-i Imkong L. Imchen-i takok angu. Imkong L. Imchen ya election punguben medangdangi adokba yimsüsür ka liasü aser tang tashibo pa ya Koridang nung MLA talangtiba inyaksang lir. 

INC candidate Chalukumba ya tan by-election-i aiba züngabo pezüben asütsü. Election asem rongnung pai tajungtiba ngutetbaji 2018 election nung Imkong L. Imchen (NPF), C. Lima Imchen (NDPP) aser pa NPP nungi toktep aser 128 vote agi dang pa tamakok angu. Imkong L. Imchen ya 2003 küm Independent nungi, 2008-2018 NPF, aser 2023 BJP nungi adok. Daochier, Imtiwapang, Abenjang aser Imchatoba par pezü yabo tang mezüngbuba election nung tokteper.

“Taoba mapangbo election nung nübu shiba tetemsü aser shiba shim nung nübur asoshi tajungba asütsü ta tangatetba nung shilem agi, saka tanübo shibai sen teimba amshir, shibai tashiyim amshir, shir yim vote teimba, parnok jagi dang teimba akoker, iyongji tetemsü lenir shimtsü kanga saka kümogo”, ta iba osangbeneri Koridang nung voter ka den jembidang pai metetdaktsü.

Koridang constituency kübok yim tulu pezü lir – Longkhum, Mangmetong, Khensa aser Chungtia. Khensa yim dak alaka Chungtia nungi candidate 3, Mangmetong nungi 2, aser Longkhum nungi ka lir. Anungji, Khensa, Yimyu ward & Meküli voters-temi shiba nem teimba agütsür, ta asüba nung telemtetba agitsü, ta nüburtemi jembidar.

Candidate par 6 prongla pungmang jenti bener alima nübur tenzüktsü tejangraba tulu yur election nung noktakba ola sabang balala ajanga asenoki angashiogo. Par trok prongla nübu tajung tesa, anungji, shiba adoktsüar shingaia meshiteter, kechiyong politics nungbo asenoki meimlabasa ataloker. 2024 Lok Sabha election nung PDA sarkar külen aser MLA kata maliba Congress party kisüng külen ta toktepba, PDA sarkar-i makok. Laishiba nung David o Goliath otsü amato.  2018 election nung polling anogo Longkhum nungi Chungtia-i “vote swing” asüba otsü tejangja lir. Anungji, politics nungbo shingaia shinga zübazüba/anoa bilemtsüla masü. Süra, nenokia shiba adoktsü amai bilemer?     

  Election shia Koridang constituency nung ya lendong balala ataloka aruba asenoki ajangshiogo. 2023 election nunga taküm ka sama aser tanba by-election nunga ka samaogo. Election Commission of India (ECI) ajanga election temzüng aser inyakyim sashi-sashia renemer liaka lendongji odang ataloker. Taküm-a lendong ataloktsü akok ta bilemba yim kar nungbo curfew yoka lir aser party kimen-a agiindaktsüogo. Anungji, tanba election ya-a tesünep nung agitsü asü lendong ataloktsü’ar nübur aika mulung nung tarendakba aliba osang ajanga lazüker.    

*****