Mokokchung, 16th August 2026 (www.nokinketer.in): Ajaki yongyaseta ataba Dr. T. Ao Inter-District Football Championship 2026 Oct 12-31 tashi Rempukong Ungma nung aliba astroturf football ground nung asayatsü lemtetogo, ta Honibarnü Mokokchung District Football Association (MDFA) tir, N. Akok Longkumer-i osangbener senden ka Koridang Futsal Ground, Aolijen nung akadang sangdongogo.

              Dr. T. Ao asayamung tenüker taküm ya küm 25 ajunger, anungji, ibai asayamung ka dang masü benjong ka ama akatsü terenemshiba tulu lir. Anungji, Nagaland nung aliba district ajak iba asayamung nung arua shilem agitsü pelashishia jaoker, ta MDFA tirisa metetdaktsü. MDFA-i shilem agir district team ajak atema tanendak aser apoktsü renemtsütsü, ta shisem. Iba asayamung ya All India Football Federation aküm nung Nagaland Football Association (NFA)-i kümshi ayongzüka akar aser taküm MDFA-i agizüka Mokokchung nung asaya-a amungtsü.

              Iba asayamung atema MLA & Advisor Temjenmenba tayonger aser Imsongmeren (NCS) tezülur sür maparen balala inyaka odar. Nüngtugu footabll asayar Dr. T. Ao ya Changki yim nungi asünung, NFA-i Changki yim semdanga par yimer nungi temoatsü agia iba asayamung taküm yangi amungtsü lir. Iba den ano Dr. T. Ao ya Impur chanu ka asünung, Impur nung aliba ground ji pa tenüng amshitsü sangdongogo, ta MDFA tatong tir Bendangi inyakyonga aruba otsü kar lemsatep.

Dr. T Ao championship Mokokchung nung ayongzükba ajanga takümbo MDFA Trophy mekatettsüsa akümer, ibaji asoshi sasar, saka sangküm nungi akhi ama MDFA Trophy ji kayonga aotsü, ta MDFA ketdangpurisa metetdaktsü.

              Iba osangbeneri tang Ungma nung teyangludak astroturf ground indang metetnüa asüngdangdang, “contractor ajanga ashiba agi ground maparenji 80% renemogo aser tournament asayaba mapang tashi nungjibo renemer alitsü imlar”, ta MDFA ketdangpuri langzü. Iba ground nung nisung 5000 shi mentettsü, anungji, tereprangi arurtem tim matemtsü aser tayongertemi YouTube ajanga live stream asütsü tebilemba lir, ta parnokisa metetdaktsü.

              “Taküm iba asayamung jubilee küm asünung, senpet sen (cash prize) ajungkettsü tebilem lir mali?” ta metetnüa asüngdangdang, “tatsüka lir koma asütsüar ashitsü makok saka tang tashijibo senpet sen ajungkettsü NFA nungi kecha osang yoka mali”, ta langzü. Tangji champion team nem sen lakh 3 aser runner up nem  lakh 2 agüja arudar.

              “Iba osangbenerisa taküma Mokokchung district terenemshiba koba tashi odar?” ta metetnüa asüngdangdang, “taküm ya jubilee küm asünung, Mokokchung district nung asayaba tournament balala nungi nisung 80 shi shima tetendangba agia liasü. Item rongnung selection committee ajanga ochishia aser kanga junga tendanger nisung 20 shimteta lir. Item asayartem tenüng mapang tetemsü nung sangdongtsü”, ta Mokokchung District Team Manager, Yimya Jamir-i metetdaktsü.

2024 küm Dr. T Ao Championship Tuensang nung asayadang Mokokchung team quarter final nung tsük aser yaküm 2025 nung semifinal nung tsük, saka taküm yabo final tongteta 25 silver jubilee edition yabo Mokokchung-i tepzüktsü merangtsü, ta Team Manager-isa metetdaktsü.

Mokokchung team atema head coach-ji tangalen nungi anir arutsü bushidar, Assistant Coach Tongpang shima lir, ta MDFA-isa metetdaktsü. Taküm iba asayamung ya balaka asütsü, anungji, iba asayamung takok ngua agitettsü asoshi lokti tentet aser nüburtem ajaki amalitepa aser nungita yaridaktsünür, ta MDFA ketdangsürtemisa mepishia metetdaktsü.   

👉 Follow www.nokinketer.in & the Nokinketer Page (Facebook & Instagram) for the latest news, breaking stories, articles, and reliable information updates. For press releases, notifications, articles, advertisements, etc., please WhatsApp 7005638013 or email 📧 us at nokinketer2010@gmail.com & sashimerenjamir@gmail.com.