Mokokchung, 16th August (www.nokinketer.in): Naga People’s Front Youth Wing Mokokchung Division-i ayonga ‘Leadership Meet’ ta sür sentong ka “empowering youth voices for a transformative future” omen dak rangloker Honibar nüto parnok indang division office nung kaogo. Iba sentong nung lenla balala nungi NPF lenirtem adenshia shilem agia aden.

Iba sentong nung tetushi tesemdanger Nagaland RD & SIRD Minister, Metsübo Jamir-i jembidang, tangar dak metaloka meli-i pei sasa noktaktetba lanur kaka asütsü ayongzük. ‘Pei tepok sünger ang tsürabur aser adianu yaritettsüsa alitsü merangang’, ta pai ashi.

Lanurtemji tarutsü teimla aser tsürabur nükla ajak nenok dak lir, anungji, meshimetsüba yimya ya melenshir pei sasa mapa agi inyaka sayuteter kaka asütsü, pai metetdaktsü.

NPF maitsü mamatoktsü atema ashidang, tanü Nagaland nung “oppositionless government” aoba ya solution meji lungjemba dang, saka ibai “oppositionless party” masü. Political party shia nükjidong balala lir, ta paisa jangjashitsü. “NPF ya tanga party den memeyokteptsüla”, ta paisa nenshi.

‘Party inyakyim nung ya tekübokba (grassroots) nungi tenzüka jenjang balala lir, aji oda, party nung nükmenji nenok lir aser onok yabo kilem (roof) dang, nükmen tashi meitra aser akanga melira, party ji laotsü’, ta ashi. Anungji, lenirtemi pei mapa meteta tapok mepadaktsüi o kisüng masü mapa dena inyaktsü asoshi paisa ajungshi. Nükjidong tila masü tulu ayuba den lenir ta asüba tetezü angateta alitsü asoshi ta paisa shisem.

Telungjem nung tashi lir ta angateta kadi ka yaritep nung dang asenok tejakleni aotsü, anungji, lungjemer takok ngua sayutsü asoshi paisa ayongzük. Mokokchung district nung ya menden 10 lir, anungji, sarkar akümba nung asenok ola tulu lir, ta paisa shisem.  Tetushi tesemdangerisa “NPF Lanur Ola” ta sür music video ka sayatsü. Iba kenji NPF Youth Wing YouTube channel nung angutsü.  

Nisung shia tejangraba aser nükjidong balala yur politic nung ajemoker, saka nübur taginüba ama lenji-i aotsü merangdang aiben asen tebilemba tezülen yutsütsüsa akümer. Anungji, temelenshi ka adokdi süra yim politics ya toktsür mulungsentsü melenshir lenla tasen ka tenzüka aotsü nüngdaker, ta tongti o jembir taoba MLA & CEC Member Imnatiba-i metetdaktsü.

Temelenshi ka bener arudi süra tzükong 6 sangertemi pei tzükong atema dang mebilemtsüla. Saka tebilemba ajak benteper “arok tarutsü (collective future) ka dang yanglutsüla”, ta pai ashi. Akhi yimya nung dang odi ta süra asenok tejakleni mera moutettsü, ta paisa shisem. Anungji, lanurtemi alima tejakleni aotsü asoshi tensa den apet inyakyim (model) tasen ka yangertsü asoshi paisa ayongzük.

Paisa lanurtem nem inyakdaktsünüba tebilemba ka lemsatepdang, Mokokchung nung ya “Nagaland Pioneers & Heritage Centre” ta sür ka tenzük nung ajungtsü aser iba centre nungji Nagaland otsü aser lipoklisang tapu balala bendena yutettsü aser ibaji shisa tarok bushiba riju ka küma otettsüsa ngujem tulu yur inyaktsüla. Paisa iba dak sentakba nung ashidang, Mokokchung district nem “Land of Pioneers” ya Nagaland CM Neiphiu Rio-i agütsüba lir, anungji, Mokokchung division lanurtemi iba mapa merangtsü asoshi paisa ajungshi.

Iba sentong nung lanur parnok 22 tashi division aser A/C level mapa balala nung ainoka tenangzükba agi aser ibaji NPF Mokokchung Division President Repameren Yaden-i ketdang süa liasü.

Iba sentong nung NPF Central Youth Wing President N. Akok longkumer, Mokokchung Div. Y/W President Takonungsang Pongen, Mokokchung Div. Y/W Working President Alichang Kichu, Y/W 22 Arkakong A/C President Wapangtoshi K. Jamir, Y/W 25 Mongoya A/C President Imsutoba Jamir, Mokokchung Div. Y/W Secretary Nungshisenla parnoki shilem balala agi.   Tanabuba senden “Media Awareness” ta sür “navigating the digital frontier: Media literacy, cyber laws, and leveraging media for political leadership in Nagaland” onük nung agi aser iba sentong nung shisalen sayurji Toshi O. Longkumer Advocate, Guwahati High Court Kohima Bench liasü. Mkg Div. Y/W Vice President Limatongzük Jamir onir liasü aser Mokokchung Div. Y/W General Secretary (Admin) Temsulong-i melepzüng o shia iba sentong tembang.          

👉 Follow www.nokinketer.in & the Nokinketer Page (Facebook & Instagram) for the latest news, breaking stories, articles, and reliable information updates. For press releases, notifications, articles, advertisements, etc., please WhatsApp 7005638013 or email 📧 us at nokinketer2010@gmail.com & sashimerenjamir@gmail.com.