Alima ajunga den külemi Mokokchung nunga Mokokchung Photography Club (MPC)-i taküm küm asoshi shimtetba omen “home” dak rangkloker ‘World Photography Day’ nüngtem sentong ka 19th August, 2026 nü MMC conference hall nung ayongzüka mungogo. Iba sentong nung photographer-tem den noksa tangoktsü jangrartem, MPC mezüng tenzükertem aser osangbenertem densema liasü.  

Sentong nung tetushi tesemdanger Mokokchung DRDA Project Director, Imyapangla-i jembidang, photography ya noksa tangokba kisüng dangbo masü, ibai noksa tangokba dang nungi alia inyakba mapa ka lir, ta ashi.

Asenoki noksa reprangdang noksa kisüng merepranger, iba yagi mapang indang ashir, otsütem yimdangi arudaktsür aser iba yagi süiren indanga sayur. Koba noksa südir süaka noksatemji photographer karibosa tangokba lir, anungji, noksa tangoker dakji tashi tulu lir ta metetang, ta lai ashi.

‘Nai noksa kisüng tangoker masü, nai item temungratsü mapangtem wazüka yutsüba den item otsüji tarutsü putu dang ashitsü. Anungji, “maneni noksa tajung aika tangokdenba den ano nenoki maongka yanglutsü merangang”, ta lai ayongzük.

‘Maneni telung tonga ia angazüktsü merangang, akokba tashi rizünga yuang, aser ne mapa nung maneni tamang ka-ang’, ta lai ajungshi. Tarutsü nung sarkar mapa angutsü ata-a tekazü, ajakibo sarkar mapa inyaktsü maongka mangutsü, kechiyong sarkar mapaji telatet ka dang. Anungji, ‘pei sempet meteta shisatsü angazüker nai langka kar apiteta tagitsü jenjang ka kümdakjang’, ta laisa shisem.

“Mapa inyaktsü maongka mata-i nai ne sasa mapa apitettsü merangang, aser mapa (job) tazüng kwi lir? ta masü, nai nisung kwi nem mapa inyaktsü maongka lapoktsür?” ta asüngdanga kechi mapa südir süaka meranga inyaktsü laisa lanurtem dang ashiakang o ka metetdaktsü. ‘Sempet aketer aser meranga inyaker metenbo camera ajanga maongka lapoktettsü ngujem tulu angur’, ta laisa shisem. Laisa Photography Exhibition ka lapoktsü aser iba nungji MPC züngsemtemi tangokba noksa kar den tejen camera kar aser tawa agiba MPC-i taküm omen dak ajemdaker ayongba mobile phone photography tetoktepba nung shilem agirtemi tangokba noksatem sayua liasü.  

                Mobile Phone photography tetoktepba ya Mokokchung district nung alirtem atema liasü aser nung nisung 66-i shilem agi aser item rongnung Odichuba Ozukum (Sungkomen)-i mezüng jenjang angu, tanabuba nung Akangkokba (Ungma) aser tasembuba nung Tekatemjen Walling (Sungratsü) liasü. Takoker nem kulikaket den senpet sen dena senpettsü, aser item senpetji – Aienla Jamir (BDO, Tuli), Er. Wainungla Walling (BDO, Kobulong) aser Lanutemjen (BDO, Chuchuyimlang & Changtonya) par asemi tenla-a renemtsü.  

                Sentong nung MPC mezüng tenzüker rongnung Longrangty Longchar-i taoba mapang atalokba den pai ajangshiba otsü kar bener arua temenungratsü lemsatep. Kumlong Baptist Arogo Associate Pastor Imna Jamir-i temoatsü meshia sarasademer sentong tenzük. MPC züngsem Imkongsenlai iba sentong ketdang süa ani. MPC Convenor Takumeren aser MPC Secretary Moamongba nadia shilem agia liasü.

👉 Follow www.nokinketer.in & the Nokinketer Page (Facebook & Instagram) for the latest news, breaking stories, articles, and reliable information updates. For press releases, notifications, articles, advertisements, etc., please WhatsApp 7005638013 or email 📧 us at nokinketer2010@gmail.com & sashimerenjamir@gmail.com.