Mokokchung, 7th July: Mokokchung nung 2nd Inter-Ward Volleyball Tournament 2023 taruba ita August 9 nungi 11 tashi Multi-Purpose Sports Complex, Mokokchung nung asayatsü lemtetogo, ta tanü July 6 nü iba asayamung ayonger Kumlong Sporting Association (KSA) ketdangsürtemi Hotel Metsüben, Mokokchung nung osangbener senden ka nung metetdaktsü.
Iba asayamung ya tongtibangsa Mokokchung town nung lanur volleyball jangrartem nem sabang lapokja pei sempet arangshidaktsütsü aser ajungshitsü mangdang yur ibai running trophy ka ama yaküm küm nungi ayonga akar, ta Organizing Committee Convenor, Dr. Imlinichet Imchen-i metetdaktsü. “Iba ajanga lanur tajung karbo adokdaktsütsü onok mangdang lir”, ta pai ashi.
Jangratemtsü kaji, iba asayamung nung shir teloki mezüng jenjang ajangzükdir, par telokji tsükdangradang kecha meli-i indang-indanga Master Imchaba Nagaland Open Volleyball Trophy nung maongka angutsü. Iba dak sentakba nung tayonger KSA o Mokokchung District Volleyball Association (MDVA) na tenangzüktep (MoU) ka renema lir aser iba asayamung nunga MDVA-i technical maparen balala nung nungittsü, ta pai ashi.
Taküm mapa tasen kaji, “Super Spiker” ta asayamung lenla nung tetoktepba ka akatsü aser ibaji shilem agir telok rong nungi tejangrar kar nem shilem agitsü maongka lapoktsütsü aser iba nungji takoker senpettsütsü, ta paisa shisem.
“Inter-ward volleyball asayamung ya Mokokchung town nung alir atema dang asütsü aser iba dak sentakba nung onoki temetettsü (criteria) kar renema lir aser itemji ward yimdentem den angatettepa inyaker”, ta pai ashi. Yaküm team 9-i shilem agia liasü saka takümbo iba dang teimba arutsü imladar, ta paisa shisem.
Iba asayamung shibai champion bendir trophy den kulikaket aser sen 30,000/- (thirty thousand), aser runner-up nem trophy den kulikaket aser sen 20,000/- (twenty thousand) agütsütsü. Nija/juri senpet best setter, best spiker aser player of the tournament shima senpettsütsü.
Iba asayamung ya league-cum-knockout yimya nung asayatsü. Registration fee team shia senpak 1500/- alitsü. Tejangrar team atema form tanü nungi agütsütsü aser form meyiptsütsü atema tesüsaba anogoji 29th July, 2023 asütsü. Kari danga iba asayamung dak sentakba nung osang tejangjaba metetnüra item number (08974742104/08837066465) ajanga tayongertem tongtettsü.
Yaküm iba asayamung Sungkomen Ward-i bena lir aser Artang Ward pur tanabuba jenjang liasü. Asayamung mapang aya tzürartem atema tebilemtsü malitsü kechiyong multi-purpose sports complex kima süngo den chiyungtsü tapu balala ayokdak lapoktsü.
Kümlong Sporting Association (KSA) ya 2016 küm Kumlong Ward Yimden akhüm kübok tentet. KSA ya tongtibangsa lanur saisapongertem ajungkettsü nükjidong yur tentetba lir. KSA tenteter külen nungi Mokokchung district telongtet nung saiapong sentong balala nung shilem agia lanur sempet aketertem ajungshia aser parnok nem sabang lapokja arudaki aser item rongnung Inter-ward Volleyball tournament ya-a nükjidong den sütepa ayonga akar.
*****
The Nokinketer 