Mokokchung, 1st October 2026 (Nokinketer News): Ne dak HIV keta aliba-maliba metettsübaji nai tendang nung dang jangjatsü. Anungji, na ratamata-a malitsü atema yakta tetendangbaji tajungba. Iba o ya ART Centre IMDH, Mokokchung, Senior Medical Officer, Dr. Temsumenla Longkumer-i 29th September nü Fazl Ali College Red Ribbon Club-i kaketshirtem atema ayongba HIV/AIDS indang shisatokden sentong ka nung jembidang metetdaktsü.

India nung HIV tashitak kanga rena aoba rongnung nütsüng yongsük medemdangra, Mizoram state ya tematiba jenjang nung lir aser Nagaland tanabuba jenjang nung lir, ta metetdaktsü. Mekümdangra kopi meli-i asenoki Mizoram alemdanga aotsü menua maka, ta tekümdangtsü ka lemsatep.

Lai HIV/AIDS tashitak menaba tera lemsatepdang, mezüngbuba nung – ibai tetsür o tebur/tebur o tebur shi nung medemba nungi teimba ataloker. Tanabuba nung – mozü achirtem rongnung ajem (syringe needle) melentepa amshiba nungia menar. Tasembuba nung – HIV aketer tetsü-i kinü tanur nem menaloktsüba, aser pezübuba nung – HIV keta alir nungi zübu mesüra azü (blood) agiba ajanga menaba kulitem metetdaktsü.

Laisa HIV agi nisung ka dak atongdang timtem balala ajuruba aser shirang balala agi menepba indang kuli kar lemsatep. HIV mesen agi koda asen temang kümzükba/anükba koba dang “immune system” ta ajar, ibaji tashimait-i kümdaktsür aser meilong tepseter, ta ashi.

Akhi mapangbo HIV agi tongra joko tasütsüba dang liasü, saka tanü medical science tejakleni aoba ama, HIV aketbaji yakta puteta treatment shitak agia antiretroviral therapy (ART) mozü chira, tangar den arishi kasasa liteter, ta kuli dena ashi. ART mozü ya sarkari angati agütsür aser item mozüji ART centre-tem nung angutsü. Nagaland nunga district teimba ka nung joko ART centre amenoka lir.

Aji oda, “HIV tashitak ya tang tashibo taneptsü mozü maka saka ibai ART mozü ajanga anepaluteter. Aji saka, ART mozü yabo tanga mozü ama masü taküm piyong achitsüla”, ta lai metetdaktsü. “ART mozü yabo khenkhen chili aser khenkhen machi toktsüli ta süra, mozü jagi ne temang mapa meinyaki akümtsü, anungji, mapang shitak nung anogoshi achitsüla”, ta laisa shisem.

Laisa inyakdaktsünüba o kar lemsatepdang, “ne dak HIV keta ali mali? Metettsü atemaji nai tetendangba agi nungdang jangjatsü, anungji, ratamata malitsü asoshi yakta tendangtsüla”, ta ajungshi.

“Ne dak HIV aketba putetra imlibilema miimshia meyui ner kinungtsü, kinungbu, pei tedongtechi (partner) dang ochi shia ashitsüla aser parnokjia anir arua HIV ji aket-maket tendanga treatment tenzüktsüla”, ta ashi.

“Nisung aikadi HIV puteter külen tejashi nung temesepba chiyungtsü nung amdaker, item nisungji aiben HIV agi masü saka tanga tashitak agi meneper asürtema ajangshiogo”, ta lai ashi. Ano “shisatsü tamajungeribo tangar aika nem menaloktsütsü meranger”, ta laisa tekümdangtsü olen ka ashi. Yimya agi school aser higher secondary nung yabo tazüokba balaka nung ayur, saka tanübo nenok ya college nung ajemokogo. Nenok pungmang tulu yur yangi shisa aneti arua alitsü aser tsüraburtemia nenok dak teimla tulu lir, ta lai ashi. Tang ya nenok tebenjem mapang asünung, nenok dangi tatidang aikadi semdangtsü aser temelenshi aika nenoki ajangshitsü aser anogotem tamajung lir. Anungji, kanga kümdanga alitsüla merangang, aser shi medemba ya asenok mesoittet, anungji, HIV aser tanga tashitak balala nungi kümzüka/jenbua alitsü asoshi lenmang tajungtibaji condom amshitsüla, ta laisa ayongzük.

*****

👉 Follow www.nokinketer.in & the Nokinketer Page (Facebook & Instagram) for the latest news, breaking stories, articles, and reliable information updates. For press releases, notifications, articles, advertisements, etc., please WhatsApp 7005638013 or email 📧 us at nokinketer2010@gmail.com & sashimerenjamir@gmail.com