Ajaki yongaa ataba 3 buba Mokokchung inter-ward volleyball  tournament 2024 “forging champion” omen dak rangloker Aug 7 nü yangi Multi-purpose sports complex, Mokokchung nung asaya tenzükogo. Iba asayamung ya Mokokchung District Volleyball Association  aküm nung Kumlong Sporting Association-i ayongzüker.

                Taküm iba asayamung marok shir ward-i bendir, mezüngbuba jenjang nem senpet sen 30,000/- aser tanabuba nem 20,000/- agütsütsü. Iba den nija senpet itemi – Best Setter, Best Spiker aser Player of the Tournament shima senpettsütsü, ta tayongertemi metetdaktsüogo. Iba asayamung ya Aug 9 tashi asaya-a amungtsü.

                Taküm iba asayamung nung Mokokchung town kübok ward 8-i shilem agitsü lir. Pool ana kümer asayatsü. Mezüng Pool ‘A’ nung – Kumlong, Mongsenbai, Lijaba Lijen aser Artang ward ta alitsü, aser Pool ‘B’ nung – Sungkomen, Marepkong, Penli aser Alempang ward-tem alitsü.

                Mokokchung District Volleyball Association tir, Imtipokyim-i sentong nung tayongzükba o jembidang, iba asayamung ajanga volleyball asayar lanurtem nem sabang lapoktsüba den yangi nungi asayar tajung adokba ngua pelaba metetdaktsü.

                Nagaland nung Inter-district asayamung nung Mokokchung district-i champion 11 ben metangdangi bena lir. Iba ya talisa asayartemi meranga asayaba den iba ama asayamung ayongba ajanga lanurtem pei sempet arangshitsü sabang peria angubayong lir, ta ashi.

Tawa north-east nung asayamung ka asayadang, Nagaland team nung Mokokchung nungi parnok 7 tashi shimoka shilem agia liasü aser item asayartemji yangi shilem agiba ngua pelar, maneni pei asayaba telok den Mokokchung district aser Nagaland state nem tenüng tajung bener arutsütsü nükjidong tajung yur asaya paisa ajungshi.

                Volleyball ya pei sempet sayuba den jakla yimya tendanga asayaba asaya ka lir, yangi telungjem aser tangatetba nüngdaker, tang ya alima dang pei sempet tajungtiba sayutsüba mapang ka lir, anungji, ne dak aketba sempet/jakla tajungtiba agi shilem agitsü MDVA tirisa ayongzük.

                 Kumlong Sporting Association ya 2016 küm Kumlong Ward Yimden aküm nung tentet. Iba telok tentetba ya tongtibangsa lanur saisabonger adokdaktsütsü nükjidong lir. Tenzüker arudang Mokokchung district kübok lenla balala nung lanurtem saisabong tsütsü akokba tashi ajungshia arur. Inter-ward volleyball asayamung ya volleyball asaya tsütsü lanur sempet aketertem tera tashi ia ajungshitsü nükjidong nung taküm agi kümsembuba ayonger. Iba ya kümshi asayaba asayamung ka kümdaktsütsü meranger. Ya tenzüker talangka masü saka asayar pungu (5) tashi district/state player adokogo.

                Asayamung tenzüka mezüng asaya yaküm champion Kumlong ward o Mongsenbai ward na asayaba Kumlong-i points 25/21 aser 25/10 agi Mongsenbai pur madak takok angu.