Hannah Roshan Brown-i züluba “The Road to Tiyong” kaket saya

Mokokchung, 18^th August 2026 (www.nokinketer.in): Aliba nunger tamo Hannah Roshan Brown-i tanurtem dak rangloker English oshi nung züluba kaket ka tenüng agi “The Road to Tiyong” Mungulbarnü yangi The Play Café Mokokchung nung la teko Lanukaba Imchen-i sayatsüogo. Iba sentong nung kaketzülur kibong, kidangkimang aser medemertem densema liasü.    

            Lai iba kaket ya Nagaland nung aliba tanurtem dak rangloker züluba lir. Tesüngmangtsü lima angutsü asoshi bendang lima talang bushia aotsü menüngdaker. Asen meketa aliba reprangang, na tetsüng ajemokdak ajaklen tobur tajungji lir. Iba kaket yagi nai ner ki sabua bushitsü, ne tera indang tali angazüktsü aser nai ner lima jangratema benjongtsü imlar, ta tezüluri metetdaktsü. Iba otsü yagi tanurtem kaket azüngtsü yimya sübadaktsüba den tajungshiba angutsü imlar, ta laisa shisem.

            Tanurtem mobile phone lar kümer, iba talenba nungi piladaktsütsü asoshi farm nung tanurtem den mapang intokdang tajangshiba balala indang iba kaket nungji shia angutsü.   

Kaket nung tapu 6 keta lir – “An Adventure Awaits”, “Beyond the Classroom”, “The Road to Tiyong”, “The Heart of the Farm”, “A New Dawn” aser “Until the Next Time”. Otsütemji lar kibong nung ajangshibatem teimba lir. Iba kaket nung Mongsen oshi kar zülusema lir.  

Iba kaket nung Fazl Ali College Mokokchung nung tesayur Dr. Bendangrenla S. Longkumer-i omasa (forward) züluja lir aser sentong nunga lai mapang tatsüka agia kaket indang lai angatetba olen kar lemsatep. Director of Mission & Training FGAG, Bangalore, Dr. Basant Prakash-i iba kaket meshitettsü.   

Kaketzülur Hannah Roshan Brown ya England tsür lir, la 2015 nungi Nagaland nung alir. Tanübo la Aliba nunger Limaonen Imchen den kibong kümer Mokokchung town nung alir. Tsüngremi par kibong nem tanur tajung asem moaja lir. Tezülur ya tetsü tajung ka dang masü Jubilee Memorial School nunga tesayur aser Mokokchung Play Café ya-a lai anepalur.    

Iba kaket ya tanurtem atema dang masü saka tsüraburtem asoshia sakuku tongtibang asütsü, kechiyong yangi anatsülen tangazüktsü aika lir, ta kaket züngtsür ka den jembidang pai lemsatep.

Talinürtemi iba kaket Mokokchung Police Point F.A.C Bus Stand anasa aliba Nata Company dokan aser Play Café nung angutsü, aser Mokokchung town telungtet nungbo ki tonga bener arutsütsü (free delivery). Iba kaket dak sentakba nung osang tejangja metetnürtemi iba Mobile No. +91 93662 46973/+919378119582 nung tongteprateptsü akok.   

👉 Follow www.nokinketer.in & the Nokinketer Page (Facebook & Instagram) for the latest news, breaking stories, articles, and reliable information updates. For press releases, notifications, articles, advertisements, etc., please WhatsApp 7005638013 or email 📧 us at nokinketer2010@gmail.com & sashimerenjamir@gmail.com.