Lanurtem nem maongka lapoktsü nükjidong nung Ao Kaketshir Mungdang (AKM) o Emporium Training & Consultancy Pvt. Ltd. (ETCPL) na tsüngta 7th August, 2023 nü tenangzüktep (MoU) ka AKM office nung agiogo.
Iba MoU ya küm 5 atema asütsü aser MoU nungji AKM tenüng nung tir, Lanutoshi Aier aser ETCPL tenüng nung ETCPL Operations Manager, Anirban Mukherjee nati sign asü. Tanü iba MoU sign asüdang ETCPL Nagaland, CEO, Temjenkala-a densema liasü.
AKM den ibala mesükba riju (institute) balalai külem sür inyaktsü asüngdanga liasü, anungji, item riju balalatemji asadanga aonung, Emporium Training & Consultancy Pvt. Ltd. yagi Naga nunger rongsenkettsüng den sütepa maongkaji agütsüteter, aser yangi training agiba taah jia tangar dang nungi kanga agi tajemba agütsür, anungji, ibai asenok asoshi tapetba asütsü ta sür AKM Sanen Luden nung lemteta liasü, ta AKM tir, Lanutoshi Aier-i metetdaktsü.
Iba mapatong ajanga Mokokchung district dang masü saka asen kidanger tanga district-tem dena talisa lanur zünger mapa inyaktsü maongka menguteti alir aika tajangzük angutsü imlar. September ita nungji iba dak sentakba nung shisa lensayu (career guidance) sentong ka yangi Mokokchung nung ayongzüka akatsü, ta AKM tir-i ashi.
Mokokchung nung lanurtem pei azüngba yari itasen mangur aika angur, yamaji ano lanurtem aika sempeta lir aser tazünga zünger sürnung mapa inyaktsü maongka mengutetertema aika lir, saka tebilemtsü kaji maongka jenti liaka, asenok aikadi bendangleni or mapa meinyaknür/melinür, ano chirnurtemibo onür sürnung tsüraburi meyoknür ta timtem ajuruba lir, ta paisa ashi.
Tanü joko sorkari tazünger ajak nembo sorkar mapa magütsütettsü aser asen lima mapa inyaktsü maongka peria maka, anungji, India/bendangleni or pei sempet sayua pei taküm jenjang yanglutsübaji kanga tongtibang lir, ta paisa shisem.
AKM amala mera taket lokti ka den külem sür inyaktsüsa maongka ngutetba asoshi pelar aser iba asoshi mapang talangka nungi yongya ataogo, ta ETCPL Operations Manager, Anirban-i metetdaktsü. Tang tashi nung ETCPL ajanga Naga nunger meyi 20 dak tali nem training agütsüogo aser item rongnung aika India aser bendanglima mapa takok ngua inyakba kuli lir, ta ashi.
Nagaland nung ETCPL Centre ya Dimapur nung amenoka lir. Iyongji aiben Dimapur aser Kohima purtem dang maongka teimba agia arur, aji oda, tanga district nunga lanur sempet aketer aika alitsü ta onoki amanger, anungji, AKM den MoU yangluba ajanga Mokokchung district dang masü saka tanga district dena tajangzük angutsü imlar, ta paisa ashi.
Nagaland nung mapa manguba tebilemtsü ya ulura, anungji, AKM aser Emporium na lungjemer inyakba ajanga lanurtem maongka jenti angutsü imlar, talisa koda masür kibongtem asoshi ibai tajangzük tulu asütsü, ta ETCPL Nagaland, CEO, Temjenkalai metetdaktsü. Tanü tashi AKM-i mapatong balala takok ngua arudar, yamaji iba yaa takok angutsü amanger, ta laisa shisem.
India nung ETCPL ya tenzüker küm 17 shi arur aser Nagaland nunga ETCPL center ya 2018 nung lapok. ETCPL tenzüker tanü tashi arudang skill development tsütsü talisa Aviation, Tourism, Hospitality aser Customer Service Sector-tem nung training/mapa balala agüja arudaki. ETCPL nung training agitsü atema tazüngbaji tajemba agi class 10 bo ajanger asütsüla. ETCPL-i training course balala agütsür. Iba dak sentakba nung osang tejangja metetnürtemi AKM ketdangpur den tongteprateptsü akok.
Tawa terenlok osang tajung kaji – IDAN den külem sür mapatong ka tenzüktsü lir, ibaji talisa koda masür kibongtem nem skill loan ta sür teyari ka agütsütsü, iba teyari agir jagi pa/la training temer mapa ngur külen sentsüh ji aotsü. Nüburtemi iba maongkaji agitsü akok.
Source: Tir Yimyim
The Nokinketer 