Mokokchung, 13 May: Ao Senden-i ayonga Indian Temzüng Arla 371 (A) aser the Nagaland Village Council Act, 1978 onük nung shisatokden sentong tulu ka yangi Mokokchung town hall nung kaogo.
Iba sentong nung Ao Senden Sanen Luden aser Tongror Luden züngsemtemi anir tzükong mungdang, yimtsüng shia nungi yimsüsür, town unit balala den ano lenla tabensa nungi lokti tentet balala nungi ketdangsür noklang tenet dak tali adenshia shilem agia denogo.
Indian Temzüng kübok Naga nunger asoshi kechi temeten wazükja lir, itemji rajemtsü nükjidong yur tanü iba shisatokden ya ayongogo. Iba ya shisatokden ka dang asünung, bangzüng balaka renema mayur saka tanü jembiba tongtibang onüktem ajak zülua ayutsü aser iba dak sentakba nung mendenpuri reprangshimer tim mapatem inyaktsü, ta Ao Senden tir, Marsanen Imsong-i metetdaktsü.
Sentong nung yimpoksür Nagaland RD & SIRD Minister, Metsübo Jamir-i jembidang, Arla 371 (A) ya Naga nunger bendanger nungi kümzüka aser asen maitsü wazüka ayutsü asoshi agütsüba temeten lir. Saka ali ajak asenok indang kümer/mekazüka yur terenlok mapa inyakdi asüdang sota ayuba yimya yabo majung, ta pai melenshidaktsünüba o ka ashi.
Paisa tatishitsü kar bener arua lemsatepdang, totzü magitetdaktsütsüi noktangba, ya Tsüngremi asenok nem agütsüba temoatsü asenoki magiteter, item amala mapa aser ali agütsütsü koroba ajanga asen lima tejakleni maor, ta pai ashi. Foothill lenmang yangluba nung ya asenok lenmang aisü nung tajangzük lir, lenmang atuba ajanga dang ali jenjangjia tuluba akümtsü, anungji, ali mekoroi peria agütsütsüla, ta paisa ayongzük.
Tsüngremi Aor nem tashi temetet peria agüja lir, tanga kini asenok dak rangloker aser asenoki kechi ashir ta imlar. Tsüngremi asenok mesentok lir, anungji, asenok sensena melili ta paisa ayimoktsü. Meshimetsür kin ka masü saka pei sasa noktaktetba kin ka asütsü merangdi, ta paisa shisem.
Nagaland Chief Secretary, Sentiyanger Imchen (IAS)-i temzüng rajem o ashidang, Article 371 (A) ya Naga nunger sobaliba aser yimsüyimbong kümzüka ayutsü atema India Temzüng nung lateta aliba ka lir. Aji süaka, nisung aikadi iba tetuyuba jungjunga mangatetter aser aiben iba nükjidong aibelena ratettsür ta pai tebilemtsü olen ka lemsatep.
Tanü tashi Aor temzüng ozüngtem zülu nung adoka maka, temzüng ozüngji zülu nung ayutsübaji tongtibang, kechiyong tebang agi dang belentepba yabo khenkhenbo aibelener aser mashilen ratettsübajia ataloktsü temenu maka, anungji, zülua ayutsüla aser tensa den apet ozüngtemji tajungba moluteta yanglushia aotsü nüngdaker, ta pai ashi.
Article 371(A) ya khen atema dang yangluba temzüng ka lir, ibaji intoktsü Arla 368 nung tashi agüja lir, ta paisa jangjashitsü. Alima nung temzüng ozüng tajungtiba alitsüa akok, saka yimsüsüri koda amshir ta asübaji tongtibangba. Anungji, tejak mereprangi ochi shia yimsü asütsüla, ta paisa ayongzük. Ao Senden Legal Advisor & Gauhati High Court, Senior Advocate, C.T. Jamir-i “Indian Temzüng Arla 371 (A)” aser Gauhati High Court, Advocate, Sentiyanger Pongen-i “the Nagaland Village Council Act, 1978” onük nung ajemdaker jembia liasü. Onük ana nung ajemdaker o lemtep mapang ka agia liasü aser iba nung tesentepertemi mangatettepba aser jangjanüa asüngdangba onük aika shisalen sayurtemi tzüratema rajemtsü.
Iba sentong nung Mokokchung District Bar Association Tir, Advocate Moludongba menden liasü aser o lemtep mapang Gauhati High Court, Advocate, Aliba Ozukum onir liasü.
The Nokinketer 