Mokokchung, 1st November 2026 (Nokinketer.in): Longsa nunger Rongsennungba, Director, Department of Fisheries & Aquatic Resources Nagaland aser Surumi (Moyar yim ka) nunger Howoto, Managing Director, Multi Builders, Pvt. Limited na temba ayimba benjong ka October 31, 2026 nü Surumi Amphitheatre nung meraketa liogo.
Iba sentong nung tejaoksang Howoto-i jembidang, yimnasanger tsüngta iba ama benshia aruba ya balaka lir, kechiyong kümshi asenoki Yisu asoba, küm tasen ajuruba aser sobaliba benjongbentsü balala munga arur, saka iba amai akang temba ayimba benjong akaba yabo apara, aji oda, iba ama sentong yabo Longsa o Surumi nadi teimba benshiba angazüker, ta pai ashi.
Tanü iba sentong nung lenla tapensa nungi nübu temetem kanga longsoa sentepba ya adangji nung yimnasangeri temulung taroktiba agi tali putepa aser yimjung nung lia aotsü tejangraba sayur, aser iba yagi tesentaktep tejakleni awa oa bener aotsü teimla tesangwa angur, ta metetdaktsü.
“Ni medemer tajung aika lir aser ni medemer ayimtsü jangrar, saka tanü küna temba yimtepba yabo medemer dang alia Longsa-Surumi na sentaktepba ka lir”, ta pai ashi. Iba amai temba yimteptsüba ya asen tsürabur nem Tsüngremi shisatsü agütsü südi, iyongji tanü tashi yimnasanger tsüngta yamaji arudar. Akhibo yim telungtet nung dang liasü saka tanübo yim atener telungjem sentep tashi akaba ya jangratemtsüka lir, ta pai tawa Dimapur nung Longsa o Surumi na telungjem sentep agiba ka lemsatep.
Paisa Longsa-Surumi na tesentaktep tali akangshitsü atema tsüraburtem dang masü saka lanurtemia iba tesentaktep maneni bener aotsü asoshi yimnasanger lanur lungjemba (young connect) sentong ka ayongzüka akatsü, aser “Friendship Road” ta sür Longsa o Surumi na tsüngta lenmang ka anepalu nung koda, ta tebilemba ka ashi. Iba mapa anaji kümtetra yimnasanger tali lungjemba den tangar asoshia tatishitsü tajung ka asütsü imlar, ta paisa shisem.
Tesemdanger Rongsennungba-i jembidang, par tebu tebou nungeri Surumi den temba yimtepa jungtepa aru, iba tsüngsü tajungji mesamai maneni aotsü tejangraba tulu nung alidang, tia junga medemer Howoto den temba ayimtsüsa maongka anguba asoshi pelar aser Tsüngrem tenüng asanger ta metetdaktsü. “Iba ya ajanga kü temba küna dang masü saka Surumi nunger ajak den temba ayimer, Surumi ji kü temba akümer aser iba temoatsü asoshi pelar”, ta pai ashi.
Tebui pa dang ashiba o ka lemsatepdang, “nebou-ia Longsa meketa aliba Moyar yim balala nung medemer aika ayim, yamaji naia ayimtsü merangang” ta ajungshi. Anungji, “tanü Surumi nunger den temba ayimtsü maongka ngutetba asoshi pelar”, ta pai ashi.
Alima süiren otsü reprangdangra tamaren linük aika temba yimtepba ajanga adokba angur. Linük balala den tembar ayimba (allies) ajanga super power akümba otsü asenoki meteta lir. Temba yimtepba ajanga yimjung yanglua tamaren linük yangerba otsütema lir. Laishiba nunga medemer yimtepba angur. Anungji, temba ayimba ya nisungi dang masü saka Tsüngremi mulungba ka lir, ta paisa ashi. “Kü tembai koba Friendship Road indang shiogo, ibaji nia mulungsoa agizüker, iba mapaji asenok lungjemer inyakra yakta ataloktsü imlar”, ta paisa shisem.
Asen tsüraburi koba mapa tajungsa inyakogo iba asoshi parnok nem tenüngsang agütsüdi saka no parnoki tashi mait kar danga inyaksema lira kadi ka dang tatok agütsüteptsü aser amatoktsü, jokola tarutsü nung iba tesentaktep ya tajungba renloka bener aotsüba dak dang asenoki ranglokdi, ta paisa ayongzük.
Iba sentong nung Hokito Jakhalu menden liasü. Pastor Loino Chishi-i tetenzük sarasadem agir sentong tenzük aser Pastor Dr. Ihgato Chophy den tenüngsang agüja sarasademer tembang. Pastor Mughalu Swu-i akangtembar ana asoshi temoatsü meshia sarasademtsü. Longsa Village Council Chairman, Akangjunshi-ia o tatsüka jembi. Qheniho, Head GB Surumi-i tarur ajak pela-a agizük aser Khehoi Tsakhalu-i melepzüng o lemsatep. Telok anadi sobaliba kensü nung tesemdanger nem aküm tushi agüja ken tajung tenloktsü.
*****
