35+ MFL season 6 aser 35+ MFL Super Cub 2025 tembangogo

(35+ MFL under 14 vision League yakta tenzüktsü)

35+ Mokokchung Football League Season – 6 aser 1^st 35+ MFL Super Cup 2025 asayamung tembangba den repsema 35+ MFL Under 14 Vision League logo aser trophy lapokba sentong ka 9^th Nov, 2025 nü Aongza Ki, Mokokchung nung meraketa agiogo.

            Taküm 35+ MFL Season 6 champion Revenant FC liasü aser atongba (runner-up)-ji New Ecclesia pur liasü, aser 1^st 35+ MFL Super Cup 2025 Wasang FC pur champion, tanabuba nung Revenant FC aser tasembuba jenjang nung Nova SC pur liasü.

            35+ MFL season 6 nung nija senpet agizükertemji: best midfielder – Tongpangkokba (Revenant FC), best defender – Tiayanger (Revenant FC), best goalkeeper – Talilepba Jamir (Revenant FC), player of the league – Moatemsü (New Ecclesia), highest scorer – Arennüngsang (30 goals from Revenant FC) aser Fair play Award – Nova Sporting Club-i agizük. 1^st 35+ MFL Super Cup 2025 nung nija senpet agizükertemji – best goalkeeper – Imosanen (Wasang FC), best defender – Sentiyanger (Revenant FC), best player – Imtiyanger (Wasang FC) aser best midfielder – Tongpangkokba (Revenant FC) liasü.      

            Iba sentong nung tetushi tesemdanger Mokokchung Asst. Commissioner, Ajay Moktan IAS-i 35+ MFL under 14 vision league trophy aser logo sayatsü. Iba league ya November tatemlen mesüra sangküm 2026 küm tetenzüklen nungi asaya tenzüktsü, ta tayongertemi metetdaktsüogo. Iba mangdang asangsang kümdaktsüba ya talisa Nagaland Minerals & Mines Kibur, Temjenmoa Jamir-i anir LONGTEROK Sports Management-i teyari agütsüba ajanga lir, anungji, iba asoshi pa dang kanga pelar ta tayongeri metetdaktsü.

Iba Vision League ya Mokokchung District Football Association aküm nung ayongtsüba lir. Iba league nung Club 6-i shilem agitsü aser itemji – Rising Phoenix FC, Speedy Cheetahs, Mini Marvels, Tenacious Titans, Daring Dolphins aser Agile Avengers nungertem lir. BARAK FC den külem sür 35+ MFL-i taküm meyi mapang to hopta ka tanurtem atema football coaching clinic ka ayonga katsüogo. Iba coaching nung tanur parnok 120-i shilem agia liasü. Iba sentong nung Barak FC nungi Head Coach, Brando arua tesayuba balala agüja liasü. Iba vision league nung asayatsüpurji tongtibangsa iba coaching clinic nung adener nungi agitsü.

            Nova SC nungi asayar Mokokchung Senior SP, Vesupra Kezo NPS-i iba league nung asayadang ajangshiba o tatsüka jembidang, medemer yimtepba den taküm aser achiajemba nung tazüokba, tetoktepba nela den temang anema lidaktsüba ya jangratemtsüka lir aser atangji football yagi nisung ka taküm melenshidaktsüba ajangshia aruogo, ta metetdaktsü. Tang koba 35+ MFL-i lanurtem atema 1^st under 14 vision league tenzüktsüba lir, ya mapa tajung ka, atangji Mokokchung ya footballer adokdak tesem ka südaktsütsü asoshi asenok ajaki merangdi, ta pai ayongzük. 

            Iba sentong tesayur Dr. Imlinichet aser osangzülur Imnatola nadi len ani. 35+ MFL tang tashi jajayonga aruba otsü tatsüka management team nungi Tiakumzuki jembi. 35+ MFL convenor, Aongsen Aier-i tarur ajak pela agizük. Akangtemsü Yaden, Youth Director, MTBA-i temoatsü meshia sarasademer sentong tenzük. Akümsen Lemtur aser Temjen Lemtur nadi ken aser guitar solo tema tesentepertem ajungmesoa liasü. Organizing Committee, Chuba Phom-i melepzüng o shia item asayamung takok angutsüsa yariteper ajak dang pelaba lemsatep.

***www.nokinketer.in***