L-R: Imchanaro Kichu (District Mahila Morcha, General Secretary), O. Tinu Longkumer (District President), S. Bendang Aier (State Spokesperson) & Sentiyala (District Mahila Morcha, President). Mokokchung, 22nd April, 2026

Mokokchung, 22nd April, 2026: Women’s Reservation Bill (Nari Shakti Vandan Adhiniyam) ya 2023 nung passed asü, saka bill ka mapa akümtsü atemaji Lok Sabha nung 2/3 majority nüngdaker. Aji angu nung dang India tir-i temelaba agüja bill kaji temzüng (act) akümer aser temzüng aküm nung dang mapa küma aor, ta BJP state Spoke Person, S. Bendang Aier-i Mokokchung District BJP-i parnok office nung ayongba osangbener senden ka akadang metetdaktsü.

                Women’s Reservation Bill ji mapa akümtsü atema mezüngbuba Delimitation Bill-ji agizüktsü (passed asütsü) nüngdaker, ta ashi. India nung delimitation agir joko küm 50 shi arur. 1976 nung taoba India PM Indra Gandhi-i küm 25 tashi delimitation magidaktsüi sota ayu aser ano Atal Bihari Vajpayee sarkaria küm 25 atsünglangtsü aser ibaji taküm tembanger. Delimitation maparen inyaktsü atema küm 2 shi nüngdaker, aji oda, taruba Vidhan Sabha election ji 2029 nung agitsü, anungji, iba nung jagibo iba ya mapa akümtsü nükjidong yur item bill ya tatar hoho nung passed asütsü merangba lir saka aji mesütet, ta paisa jangjashitsü.

                “Tetsürtem nem menden wazüka yutsütsüba bill opposition-i magizüki noktangba tetezü parnoki tetsür nem yimli magütsünüba mapa agi sayur aser iba asoshi sashisashia aitsür”, ta pai metetdaktsü. Delimitation bill ji agizük nung dang women reservation jia mapa kümtettsüba lir, anapronglaji külemi inyaktsü nüngdaker, ta paisa shisem.

                Modi sarkari tang aliba tatar hoho menden ya shilem teimba ajungketnür, kodang yamaji südir, Nagaland nung Lok Sabha aser Raja Sabha nung menden kaka aliba ya ana-na akümtsü. Anungji, itemji ataloktsü atema delimitation-ji agi nung dang women reservation-jia mapa kümtettsü, ta paisa jangjashitsü.

                Tetsürtem nem temeten wazüka yutsüdi ta asüdang, opposition-i iba anema noktangba yabo kanga sasa-a bilemtsür, ta Mokokchung District President, O. Tinu Longkumer-i metetdaktsü. Tanü iba bill magizüktetba ya tatem masü, ibai tetenzüker ka dang. Anungji, tetsürtemi tezü metangi atatsü aser kenübo ibai asangsang ataloktsü asoshi sarasadema atadaktsü aser Mokokchung District BJP-ia akokba lenmang ajak nung jembia inyaktsü merangtsü, ta paisa mepishia metetdaktsü.

                Naga tsürtem atema ibai kechiba tongtibang ta süra, Delimitation bill aser Women Reservation bill ji kodang agizükdir, asenoka tatar hoho/tatar senden nung amentsü maongka angutsü, ta District Mahila Morcha General Secretary, Imchanaro Kichu-i metetdaktsü.

Tanga state apibo Nagaland nung tetsür meyonger (representative) kanga ajema lir. Tanübo tetsürtem lenmang balala nung jenjang tajungba kümdar, anungji, political nunga women reservation bill ya agizüktet nungbo yangi maongka aika sentaka lir, aser iba ajanga lenmang aisü nung tetsür jenjang ajungkettsü imlar, ta lai ashi. Tanü Naga tsürtema tashi temeteter aika atudar, anungji, 33% women reservation ya kechi südir süaka agitettsüsa merangtsüla, ta laisa ayongzüka ashi.

Delimitation ya BJP indang inyaksangshi ka masü, ya India temzüngi melaba maparen ka inyakerba dang ta lai jangjashitsü.

BJP-i aniba sarkar yagi tetsürtem jenjang ajungkettsü atema sentong tapu balala yanglua inyakba angur, aika rongnung talisa lakhpati didi yojana ama, beti padhao beti batao ama aser Mission Indradhanush amala sentong balala inyaka arudar. Kodang women reservation bill ji agizüka mapa kümdir, tang dang nung mapatong tajungba bener arutsü sarkar terenemba lir. Anungji, talisa tetsürtemi asenok temeten asoshi maneni noktaktsüla, ta laisa ayongzük.

Delimitation aser women reservation bill ya party aser tamangba yimsü anema raraba tebilemtsü ka masü, ibai yimden onük (political agenda) ka dang lir, anungji, tetsürtemia iba nung yabo tepukümdaktsünür, ta District Mahila Morcha President, Sentiyala-i tetsürtem ayongzük. Linük ka jenjangji tetsür jenjang ajanga sayur aser akhi putu nung dang melii asenoka alima tejakleni aoba den tsüngkang medema aotsübaji kanga nüngdaker, ta laisa shisem.

*****