Mokokchung, 28th April, 2026: Chuchuyimlang nung aliba Ashipo Society-i 3 buba Moatsü mung kenten sentong ka taruba ita May 1, 2026 aonung 6:00 ako nungi tenzük Anü Mai Amphitheatre, Chuchuyimlang yimdak ayongzüka lir, ta tanü Ashipo teloki Hotel Magnus, Mokokchung nung osangbenertem den jembidang metetdaktsü.
Iba kentenmenü sentong nung Dimapur Urban Council Chairman Federation (DUCCF) Tir, Zasivikho Zakiesato tetushi tesemdanger asütsü jaoka lir. Jangratemtsü kaji iba aonung Guest Artist-ji Nagaland nungi nüngtugu ken mejemer aser atener Keneisenuo Sorhie aser Momo Girl atenla Aseno Metha nadi tongti shilem agitsü. Iba den ano Chuchuyimlang yim aser temeket yimtsüng balala nungi kentener tajung kar jaoka lir, ta parnokisa metetdaktsü.
Iba sentong ya tongtibangsa lanur kentenmenü jangrartem anitena parnok nem sabang lapoktsütsü aser parnok sempet arangshia ajungkettsütsü nükjidong yur taküm agi joko kümsembuba ayonga arur. Ano iba sentong ajanga senso nübur tsüngta kadi ka metettepba den tesentaktep tali akangshitsü aser iba ajanga telungjem adokdaktsütsü taginüba nung ibai ayonga akar, ta Ashipo Society mendenbuba Imlinok-i metetdaktsü.
Sobaliba, yimsüyimbong aser pei tetsü oshi wazüka ayutsü nükjidong yur Ashipo Society-isa online ajanga Ao oshi nung ken tetoktepba ka taküm agi kümsembuba “Ao Folk/Folk Fusion Song” ta sür ayongzüka arur. Taküma tang tashi nung tetokteper parnok 10 arua lir. Iba nung arishi küm tasazük kecha mali shilem agidaktsür aser takok osangji April 30, 2026 nü sangdongtsü. Iba tetoktepba nung tajungtiba ka shima sen 10,000/- agi senpettsütsü aser Moatsü Mung Concert nunga shilem agitsü maongka agütsütsü, ta paisa shisem.
Iba sentong ya tanü tashibo sorkar nungi teyari kecha medeni senso nüburtem tenlatepa ayonga arur, saka takümbo osang tajung kaji Art & Culture Department nungi teyari kar angutsü jembishinüdar, ta pai ashi. Tourism department mesüra Task Force for Music and Arts (TaFMA) amala mesüra telok kari danga teyari agütettsü nungbo iba sentong ya tajungba/tuluba aser metitemi ayonga aotsüsa lenmang satema lir, ta paisa tebilemba ka lemsatep.
Ashipo Society ya 2011 nung tentet aser iba telok nung züngsemtemji lanur tesa parnok 7 lir. Par telok tenzüker külen nungi parnoki shisaluruin (education), saisabong, sobaliba kentenmenü tsütsü aser ano lokti mapa balala nung temulung agüja inyaka arur. Par telok ya society register asütsü merangdar ta parnokisa metetdaktsü.
Moatsü Mung Concert reprangtsü atema ticket alitsü menüngdaker, anungji, tejangrar ajak iba kenten benjongi pelashishia jaoker, ta Ashipo telokisa ayongzüka metetdaktsü.
The Nokinketer 