(Kishikina yim, Aor aser Naga nunger ajak benjong daki pela shishia jaoker)
Chuchuyimlang yim, 28th April, 2026: Aor Moatsü benjong meraketa amungba indang jembidang aiben asen mulungjangi arubaji Chuchuyimlang nung Moatsü amungba indang ya jet ta arur, kechiyong par yimdak Moatsü amungba yabo tangar dang nungi kheni balaka metsünga reta amunger.
Ao lima ajaklen nung Moatsü amunger saka ozü yimdak alakteta amungba kaji talisa onoki kishikina Aor dang masü saka tanga kin shirnok den ancha sobaliba benshia arur, item yimtem jaoka longsotepa mungteper. Iba ajanga onok tsüngta telungjem tali adokba den temeim akangshia sentakteper. Inyakyim balakaji ngua Nagaland sarkari 2000 küm to Chuchuyimlang yim ya “Moatsü Destination” nüngja agütsü.
Aji oda, tanga mapang nung amato maneni taküm küma May 1, 2026 nüji Chuchuyimlang Tourism Committee ajanga Moatsü benjong sentong tulu ka Anü Mai Amphitheater nung ayongzüka lir, ta tanü Chuchuyimlang Village Council Chairman, Ao Sanen Pongen-i osangbener senden ka nung metetdaktsü.
Taküm iba benjong nung Nagaland Deputy Chief Minister, Yanthungo Patton aser Advisor to Nagaland Chief Minister, Abu Metha na ka tongti tesemdanger aser ka tetushi tejaoker asütsü sentong renema lir.
Sentong nung Yaongyimsen aser Unger na den ano tanga kin nungi Pongching (Phom) aser Chakpa (Chang Meden) nungi yartsüngsang teloktem shilem agitsü jaoka lir. Iba aonung Moatsü concert ka alitsü aser iba sentong nung Dimapur Urban Council Chairman Federation (DUCCF) tir, Zasivikho Zakiesato special guest asütsü jaoka lir. Jangratemtsü osang tajung kaji – iba kenten sentong nung Nagaland nung nüngtugu kentener Keneisenuo Sorhie aser Momo Girl atenla Aseno Metha na den ano kentener tajungtemi shilem agitsü lir, ta metetdaktsüogo.
Akhi nungi Chuchuyimlang-i ancha sobaliba benshia aruba yimtemji – Konyak kin nungi Changlangshu aser Okha yim, Phom kin nungi Yachem, Yaongyimchen, Orangkong, Pongu, Hukpang & Pongching yim, Chang kin nungi Yaongyimti old, Yaongyimti New, Chakpa, Longra, Yangpi & Yali aser Sangtam kin nungi Chungliyimti yim lir. Item yim ajak iba benjong nung pei kin tata sobutsü sobur arua adentsü jaoka lir, ta tayongertemi metetdaktsü.
2000 nung state sarkari Chuchuyimlang ya “Moatsü Destination” shim süra iba indang tajangzük kechisa mesüra iba nüngtem nung terenlok mapa karbo inyaka lir na? ta metetnüa asüngdangdang, “tang tashibo Moatsü Destination tenüng nung sarkar nungi terenlok aruba mapa kecha maka, kümshi Chuchuyimlang nung Moatsü benjong amungba ya senso nüburtemi tenlaba ajanga lir”, ta Council Chairman-i langzü. “Saka yasür teyari meshitsü tebilemba lir”, ta paisa ashi.
Tongti tesemdanger jaokertem nungi terenlok mapa karbo meshitsü tebilemba ali asü? ta asüngdangdang, “yamaji kecha balaka tebilemba mali saka parnoki kar danga agütsüra lanlia”, ta paisa menürema langzü.
May 1 nü koba Moatsü benjong amungtsü lir, iba nungji Aor, Naga nunger aser tejangrar alima penzürtem ajak pela shishia jaoker, ta parnokisa ayongzüka metetdaktsü.
The Nokinketer 